Меркел ба бастани сарҳадҳо бинобар коронавирус мухолиф баромад

ДУШАНБЕ, 12.03.2020 /АМИТ «Ховар»/. Канслери Ҷумҳурии Федеративии Германия Ангела Меркел дар нишасти матбуотӣ дар Берлин гуфт, ки баста шудани сарҳад посухи мувофиқ ба мушкилоти коронавирус нест. Дар ин бора АМИТ «Ховар» бо истинод ба «РИА Новости» иттилоъ додааст.

«Мо дар Германия чунин мешуморем, ки баста шудани сарҳад посухи мувофиқ ба мушкилот нест»,-гуфт Меркел ва илова кард, ки карантини хонагӣ метавонад як тадбири қобили қабул бошад, ки паҳншавии ин бемориро дар  ҳолате, ки агар  одамони сироятшуда аз минтақаҳои осебпазир меоянд, коҳиш диҳад.

Рӯзи чоршанбе дар бораи фавти се нафар  аз коронавирус дар Германия хабар дода шуд. Ҳама ҳолатҳо дар Рейн-Вестфалияи шимолӣ ба қайд гирифта шуданд, аз ҷумла, дар шаҳри Эссен зани 89-сола ва дар ноҳияи Хайнсберг боз ду нафар фавтиданд. Ғайр аз ин, рӯзи якшанбе дар Миср як сайёҳ аз Гамбург аз коронавирус даргузашт. Рӯзи сешанбе Институти Роберт Кох хабар дод, ки дар Германия 1,139 ҳолати марбут ба коронавирус тасдиқ шудааст.