Пешвои миллат Эмомалӣ Раҳмон дар як қатор мақомоти давлатӣ таъйиноти кадрӣ ба амал оварданд

Март 6, 2020 11:42

ДУШАНБЕ, 06.03.2020  /АМИТ «Ховар»/. Имрӯз Асосгузори сулҳу ваҳдати миллӣ, Пешвои миллат — Президенти Ҷумҳурии Тоҷикистон муҳтарам Эмомалӣ Раҳмон бо кадрҳое, ки дар мақомоти Прокуратураи генералӣ, Шӯрои амният, Вазорати мудофиа, Агентии назорати давлатии молиявӣ ва мубориза бо коррупсия, сохторҳои Вазоратҳои маориф ва илм, рушди иқтисод ва савдо ва мақомоти иҷроияи ҳокимияти давлатӣ дар маҳал таъин гариданд, мулоқот намуданд.

Бо фармонҳои Президенти Ҷумҳурии Тоҷикистон Ватанзода Маҳмадалӣ бо сабаби ба кори дигар гузаштанаш аз вазифаи Котиби Шӯрои амнияти Ҷумҳурии Тоҷикистон озод гардида, Маҳмудзода Насрулло, ки то имрӯз дар вазифаи Прокурори вилояти Хатлон фаъолият дошт, Котиби Шӯрои амнияти Ҷумҳурии Тоҷикистон таъин гардид.

Раиси ноҳияи Мурғоби Вилояти Мухтори Кӯҳистони Бадахшон Чошбаев Мурзабай бо сабаби расидан ба синни ниҳоии дар хизмати давлатӣ будан аз вазифа озод ва муовини раиси ҳамин ноҳия Раҷабзода Ҳусния раиси ноҳияи Мурғоб таъин гардида, Мурзамат Абдулқаюм дар мувофиқа бо Президенти Ҷумҳурии Тоҷикистон муовини Раиси ноҳияи Мурғоби Вилояти Мухтори Кӯҳистони Бадахшон таъин гардиданд.

Саидзода Шоҳин директори Агентии назорат дар соҳаи маорифи назди Президенти Ҷумҳурии Тоҷикистон, Идизода Файзалӣ сардори Раёсати илму маърифати Дастгоҳи иҷроияи Президенти Ҷумҳурии Тоҷикистон таъин гардиданд.

Бо Қарорҳои Ҳукумати Ҷумҳурии Тоҷикистон Абдураҳмонзода Абдураҳмон муовини вазири рушди иқтисод ва савдо, Бобозода Хисрав – муовини вазири мудофиа, Хоҷазода Тоҳир ректори Донишгоҳи славянии Россия-Тоҷикистон, Азиззода Ҳафиз — сардори Донишкадаи ҳарбии Вазорати мудофиа ва Абдуллозода Умеда муовини Раиси Кумитаи кор бо занон ва оилаи назди Ҳукумати Ҷумҳурии Тоҷикистон таъин шуданд.

Дар мувофиқа бо Президенти Ҷумҳурии Тоҷикистон Прокуророни вилоятҳои Хатлону Суғд, роҳбарони воҳидҳои сохтории Вазорати мудофиа, сардорони раёсатҳои Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар шаҳри Душанбе, ВМКБ, вилояти Суғд ва роҳбарони якчанд сохторҳои дастгоҳи марказии Агентии назорати давлатии молиявӣ ва мубориза бо коррупсия аз ҳисоби ҷавонони соҳибтаҷрибаву кордон таъин гардиданд.

Пешвои миллат зимни сӯҳбат кадрҳои ба вазифаҳои масъули давлатӣ таъингардидаро ба хизмати содиқона ба нафъи халқу Ватан ва давлати Тоҷикистон даъват намуда, таъкид карданд, ки ҳар як хизматчии давлатӣ ва низомӣ бояд аз ҳарвақта дида ҷиддитару бомасъулият ба кор муносибат намуда, дар иҷрои вазифаҳои хизматӣ ва ӯҳдадориҳои ҳарбӣ нисбати зердастон серталаб бошанд.

«Вазъи имрӯзаи ҷомеаи ҷаҳонӣ, дар робита ба он, ки ҳар рӯз таҳдиду хатарҳои гуногун, аз қабили экстремизм, терроризми байналмилалӣ ва дар шаклу усулҳои гуногун зуҳур кардани амалҳои зиддиинсонӣ, зиддибашарӣ ва халалдоркунандаи амнияту суботи мардум аз ҳар як фарди худогоҳу худшинос ҳушёриву зиракӣ ва самимияту садоқати бемисл ба Модар-Ватан, сарзамини муқаддаси Тоҷикистон ва мардуми шарифи он талаб карда мешавад», — иброз доштанд Президенти Ҷумҳурии Тоҷикистон муҳтарам Эмомалӣ Раҳмон дар анҷоми мулоқот.

Таъиноти кадрӣ 06.03.2020

Март 6, 2020 11:42

Хабарҳои дигари ин бахш

Пешвои миллат Эмомалӣ Раҳмон дар ноҳияи Восеъ аз боғи хоҷагии деҳқонии Миралӣ Маҳмадалӣ боздид намуданд
Президенти Ҷумҳурии Тоҷикистон Эмомалӣ Раҳмон дар ноҳияи Восеъ 12 километр роҳи мумфаршу чароғонро ба истифода доданд
Сарвари давлат Эмомалӣ Раҳмон дар ноҳияи Восеъ бинои Маҷмааи варзишии ба номи Лолахон Қаҳҳоровро мавриди истифода қарор доданд
Пешвои миллат Эмомалӣ Раҳмон дар ноҳияи Восеъ корхонаи дӯзандагӣ ва маркази хизматрасонии «Дурдона»-ро ифтитоҳ намуданд
Сарвари давлат Эмомалӣ Раҳмон дар ноҳияи Восеъ ба таври фосилавӣ ба фаъолияти як қатор иншооти таъйиноти гуногун оғоз бахшиданд
Пешвои миллат Эмомалӣ Раҳмон дар ноҳияи Восеъ Маркази касбомӯзӣ ва хизматрасониро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар ноҳияи Восеъ бинои нави Маркази ташхисии «Тибби Ҳулбук»-ро ифтитоҳ намуданд
Сарвари давлат Эмомалӣ Раҳмон Варзишгоҳи марказии ноҳияи Восеъро мавриди истифода қарор доданд
Сафари кории Пешвои миллат Эмомалӣ Раҳмон ба ноҳияи Восеъ бо ифтитоҳи Майдони Парчам ва Нишони давлатӣ оғоз ёфт
Президенти Ҷумҳурии Тоҷикистон Эмомалӣ Раҳмон роҳбарони ҳайатҳои прокуратураҳои генералии кишварҳои иштирокдори ИДМ-ро ба ҳузур пазируфтанд
Пешвои миллат Эмомалӣ Раҳмон дар шаҳри Душанбе шаҳраки нави саноатиро ифтитоҳ намуданд
Паёми шодбошии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба муносибати ҷашни Меҳргон