Ҳудуди Душанбе аз ҳисоби заминҳои деҳоти ноҳияи Рӯдакӣ фарох карда мешавад

ДУШАНБЕ, 19.03.2020. /АМИТ «Ховар»/. Ҳудуди шаҳри Душанбе аз ҳисоби заминҳои деҳоти «Чоряк­корон», «Чортеппа», «Сарикиштӣ», «Чимтеппа», «Россия», «Гулистон» ва шаҳраки Навободи ноҳияи Рӯдакӣ фарох гардонида мешавад. Дар ин замина 19 март дар иҷлосияи бисту дуюми Маҷлиси миллии Маҷлиси Олии Ҷумҳурии Тоҷикистон, даъвати панҷум  қарори Маҷлиси миллии Маҷлиси Олии Ҷумҳурии Тоҷикистон қабул гардид. Дар ин хусус хабарнигори АМИТ «Ховар» Марзия Саидзода аз ҷараёни иҷлосия хабар дод.

Раиси Кумитаи Маҷлиси миллии Маҷлиси Олии Ҷумҳурии Тоҷикистон  Муҳаммадюсуф Имомзода зимни тавзеҳи масълаи мазкур гуфт, ки ин тадбир дар асоси пешниҳоди Ҳукумати Ҷумҳурии Тоҷикистон «Дар бораи пешниҳоди маҷлисҳои вакилони халқи шаҳри Душанбе ва ноҳияи Рӯдакӣ оид ба тағйир додани сарҳадҳои шаҳри Душанбе ва ноҳияи Рӯдакӣ» андешида шудааст. Тибқи он аз ҳисоби заминҳои деҳоти «Чоряк­корон», «Чортеппа», «Сарикиштӣ», «Чимтеппа», «Россия», «Гулистон» ва шаҳраки Навободи ноҳияи Рӯдакӣ ба ҳудуди маъмурии шаҳри Душанбе 7 ҳазору 659 гектар  ҳамроҳ карда мешавад.

Мавсуф афзуд, ки зарурати васеъ намудани ҳудуди шаҳри Душанбе ба афзоиши босуръати аҳолии он, талабот ба манзилҳои истиқоматӣ, сохтмони роҳҳо, биноҳо ва иншооти гуногуни фарҳангӣ-фароғатӣ, маишӣ ва солимгардонӣ  рабт дорад.