ДАРАХТ БИНШОН! Дар Суғд дар майдони беш аз 500 гектар ниҳол шинониданд

ДУШАНБЕ, 14.04.2020. /АМИТ «Ховар»/.  Дар вилояти Суғд дар доираи амалинамоии «Барномаи рушди соҳаи боғу токпарварӣ барои солҳои 2016-2020» то 1 апрели соли 2020 дар ҳамаи бахшҳои хоҷагиҳо 459,8 гектар боғҳои нав ва 43,5 гектар токзори нав бунёд ва ҳамзамон дар майдони 763,9 гектар боғҳо ва 69,7 гектар токзор аз нав барқарор карда шуданд.

Тавре ба хабарнигори минтақавии АМИТ «Ховар» аз Идораи кишоварзии вилояти Суғд хабар доданд, инчунин дар самти муташаккилона гузаронидани маъракаи ниҳолшинонӣ дар ҳамаи хоҷагиҳои вилоят то 1 апрел аз ҷониби хоҷагиҳои вилоят дар 503,2 гектар ниҳол шинонда шуданд.

Аз ҷумла, дар масоҳати 41 гектар ниҳолҳои мевагиҳои тухмдор, дар 315,7 гектар ниҳолҳои мевагиҳои донакдор, дар 63,5 гектар ниҳолҳои мевагиҳои мағздор ва дар 39,6 гектар ниҳолҳои мевагиҳои субтропикӣ шинонда шудаанд.

Ҳамзамон дар давраи семоҳаи аввали соли 2020 ҳаҷми маҳсулоти умумии кишоварзӣ дар ҳамаи бахшҳои хоҷагии вилоят  636,7 млн. сомониро ташкил дод, ки ин нишондиҳанда нисбат ба ҳамин давраи соли 2019  10,9 фоиз зиёд аст.