Ишкошим: нақшаи даъвати баҳорӣ 100 фоиз ва сари вақт ба иҷро расид

ДУШАНБЕ, 02.04.2020 /АМИТ «Ховар»/. Ноҳияи Ишкошими Вилояти Мухтори Кӯҳистони Бадахшон нақшаи даъвати баҳориро 100 фоиз  ба иҷро расонид. Дар ин бора аз Мақомоти иҷроияи ҳокимияти давлатии ноҳияи Ишкошим ба АМИТ «Ховар» хабар доданд.

1  апрел тибқи даъват ба хизмати ҳарбӣ ҷавонони ноҳияи Ишкошим, ки синнашон ба хизмат расидааст, дар фазои идона ба хизмати Модар-Ватан гусел гардиданд.

Дар рӯзи гусели даъватшудагон ҷамъомади тантанавӣ доир гардид, ки дар он раиси ноҳияи Ишкошим Мусо Мирзозода ҳамаи даъватшудагонро сидқан табрик намуда, пеш аз ҳама, ба ҳар яки онҳо сиҳатмандӣ ва дар ифои вазифаи пурмасъул комёбӣ таманно намуд.

Дар ҷамъомад комиссари ҳарбии ноҳияи Ишкошим Шафомамад Азизмамадов, раиси Шӯрои собиқадорони меҳнат Иқбол Паҳлавонов, раиси Ҷамоати деҳоти Птуп Мамадназар Қурбонмамадов ва халифаи маркази ноҳия Ёқуб Маносибов ба даъватшудагон хизмати хубу сарбаландӣ таманно намуданд.

Наваскари даъватшуда Наҷихон Лоҷуваров аз Ҷамоати деҳоти Зонг иброз намуд, ки хизмати Модар – Ватан қарзи ҳар як ҷавон буда, аз ҳамсолонаш даъват намуд, ки ин қарзи имониву ҷонии худро дар назди халқу Ватан бояд содиқона адо намоянд.

Бояд гуфт, ки ҷавонони ноҳияи Ишкошим дар қатори дигар ҷавонони мамлакат ҳамчун зодагони даврони соҳибистиқлолӣ дар ободонию пешрафти ҷумҳурӣ ва муаррифии ноҳия саҳми босазо доранд.