Ёсихидэ Суга сарвазири нави Япония интихоб шуд

ДУШАНБЕ, 17.09.2020 /АМИТ «Ховар»/. Раиси нави ҳизби ҳокими Либерал-Демократии Япония Ёсихидэ Суга имрӯз дар мансаби сарвазир тасдиқ шуд. Дар ин бора ТАСС бо истинод ба пахши овоздиҳии мустақим дар сайти мақоми қонунгузор хабар медиҳад.

Ин номзадро аксари вакилони палатаи калидии поёнии парлумон дастгирӣ намуданд. Мувофиқи конститутсия, сухани он дар интихоби сарвари ҳукумат ҳалкунанда аст. Ба тарафдории Ёсихидэ Суга  аз 462 вакили палатаи поёнӣ 314 нафар овоз дод, илова бар ин, ӯ аксарияти овозҳоро дар палатаи болоӣ ба даст овард.

Дар соатҳои наздик сарвазири нав ҳайати кобинаи худро эълом хоҳад кард. Интизор меравад, ки аксари мансабҳои калидиро вазироне ишғол мекунанд, ки дар ҳайати ҳукумати охирини Синдзо Абэ шомил буданд. Ҳамин тавр, вазири корҳои хориҷӣ Тосимитсу Мотэги, вазири молия Таро Асо, вазири заминҳои давлатӣ, инфрасохтор, нақлиёт ва сайёҳӣ Кадзуёси Акаба, инчунин вазири Корҳои олимпӣ ва Паралимпӣ Сэйко Хасимото ва вазири эҳёи иқтисодии кишвар Ясутоси Нисимура дар вазоифи пештараи худ боқӣ хоҳанд монд. Вазири иқтисод, савдо ва саноат Хироси Кадзияма, ки дар ҳукумат масъули рушди робитаҳои иқтисодӣ бо Россия мебошад, аз нав таъйин мешавад.

Дар анҷумани Ҳизби либерал-демократӣ, ки  14 август дар Токио доир гардид, Ёсихидэ Сугаи 71-сола бо аксарияти оро раиси нави ҳукумат интихоб шуд.

ДАР АКС: Ёсихидэ Суга. Фото Reuters