Сарвари давлат Эмомалӣ Раҳмон Маркази ташхисӣ-табобатии «Шифобахши Аср»-ро дар шаҳри Хуҷанд мавриди баҳрабардорӣ қарор доданд

Октябрь 15, 2020 11:33

ДУШАНБЕ, 15.10.2020 /АМИТ «Ховар»/. 15 октябри соли 2020 Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба маҳаллаи Шарқи шаҳри Хуҷанд ташриф оварда, Маркази ташхисӣ-табобатии “Шифобахши Аср”-ро мавриди баҳрабардорӣ қарор доданд. 

Маркази нави ташхисию табобатӣ дар 3 ошёнаи аввали бинои 9-ошёнаи навбунёди истиқоматӣ ҷойгир буда, аз ҷониби соҳибкори ватандӯст Насим Мирпочоев таъсис ёфтааст.

Ҳадаф аз таъсиси марказ дастрасӣ ба хизматрасонии сатҳи баланди тиббӣ мебошад. Дар ин ҷо дастгоҳу таҷҳизоти навтарини соҳа, аз қабили дастгоҳи магнитии резонансии томографӣ (МРТ), томографияи компютерӣ, рентгени рақамӣ, ташхиси ултрасадо ва дигар технология, ки барои ташхиси дақиқу фаврии бемориҳои гуногун пешбинӣ шуда, истеҳсоли Ҷумҳурии Корея мебошанд, дастрас ва васлу насб гардидааст.

Тамоми технологияи марказро худи Насим Мирпочоев васл карда,  нозукиҳои насби таҷҳизоти тиббиро дар хориҷи мамлакат омӯхтааст.

Маркази тиббӣ аз 10 утоқи барҳавои корӣ ва шуъбаҳои қабул, ташхис, таҳлил, ҷарроҳӣ ва эҳёгарӣ иборат мебошад, ки табибони баландихтисос, ҳамшираҳои шафқат ва дигар мутахассисони соҳибтаҷриба ба беморон бо усули замонавӣ хизмат мерасонанд.

Ҳамчунин барои ташхис ва табобати бемориҳои амрози занона дар марказ шароити арзанда фароҳам гардидааст.

Зимни шиносоӣ ба Пешвои миллат муҳтарам Эмомалӣ Раҳмон иттилоъ доданд, ки дар Маркази ташхисӣ-табобатии “Шифобахши Аср” 5 ҳуҷра барои бистарӣ намудани беморон бо 10 кати хоб мавҷуд аст.

Мавриди зикр аст, ки солҳои пеш барои гузаронидани амалиёти мураккаби ҷарроҳӣ сокинон ба хориҷи мамлакат сафар мекарданд, ки дар баробари вақти зиёд маблағи гарон низ сарф мегардид.

Фаъолияти маркази тиббӣ шабонарӯзӣ буда, рӯзҳои наздик ҷиҳати боз ҳам мукаммал намудани кору хизматрасонӣ таҷҳизоти муосири тиббӣ ворид мегарданд, ки барои гузаронидани таҳлилҳои умумӣ, микробиологӣ, биокимиёвӣ ва амсоли ин пешбинӣ шудааст. Мутахассисон омодаанд бо истифода аз технологияи навин аксар намуди таҳлилҳоро гузаронанд. Бо ба фаъолият оғоз намудани боз як маркази нави тиббӣ дар шаҳри Хуҷанд 30 нафар бо ҷойи кори доимӣ ва маоши хуб таъмин шуданд, ки чанде аз онҳо табибони ҷарроҳи тоҷик мебошанд, ки дар хориҷи мамлакат таҳсил ва фаъолият намуда, дорои малакаи баланди касбӣ мебошанд.

Сарвари давлат ба сифати корҳои анҷомёфта ва шароити фароҳамгардида дар маркази муосири ташхисию табобатӣ баҳои баланд дода, ба соҳибкори маҳаллӣ ҷиҳати таъсиси иншооти муосири тиббӣ, ки барои мукаммал намудани соҳаи тандурустӣ ва ба ин восита хизматрасонии беҳтар ба сокинон пешбинӣ шудааст, изҳори сипос намуданд.

Ифтитоҳи Маркази ташхисӣ-табобатии “Шифобахши Аср” дар шаҳри Хуҷанд 15.10.2020

Октябрь 15, 2020 11:33

Хабарҳои дигари ин бахш

Сарвари давлат Эмомалӣ Раҳмон дар деҳаи Басманда хатти оби полезиро ифтитоҳ намуданд ва бо лоиҳаи заминҳои кишти картошкаи ноҳияҳои Деваштич, Кӯҳистони Мастчоҳ ва Шаҳристон шинос шуданд
Пешвои миллат Эмомалӣ Раҳмон дар деҳаи Басмандаи ноҳияи Деваштич муассисаи таҳсилоти томактабии №6-ро ба истифода доданд
Президенти Ҷумҳурии Тоҷикистон Эмомалӣ Раҳмон дар ноҳияи Деваштич 5 кӯдакистон, муассисаи таълимӣ, толори варзишӣ ва бинои маъмурии Кумитаи иҷроияи ноҳиявии ҲХДТ-ро ба таври фосилавӣ ифтитоҳ намуданд
Сарвари давлат Эмомалӣ Раҳмон дар ноҳияи Деваштич Коргоҳи дӯзандагӣ ва қолинбофии “Ёсуман”-ро ифтитоҳ намуданд
Пешвои миллат Эмомалӣ Раҳмон дар ноҳияи Деваштич Коргоҳи пойафзол ва маводи шустушӯии «Раҳматулло»-ро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар ноҳияи Деваштич Маркази саломатии деҳаи Қалъаи Дӯстиро ифтитоҳ намуданд
Сарвари давлат Эмомалӣ Раҳмон бо роҳбарон ва фаъолони шаҳри Панҷакент мулоқот намуданд
Cуханронии Президенти Ҷумҳурии Тоҷикистон Эмомалӣ Раҳмон дар мулоқот бо роҳбарон ва фаъолони шаҳри Панҷакент
Президенти Ҷумҳурии Тоҷикистон Эмомалӣ Раҳмон дар деҳоти Халифа Ҳасани шаҳри Панҷакент бо фаъолияти гармхонаи Моғиён-Агро шинос шуданд
Пешвои миллат Эмомалӣ Раҳмон дар деҳоти Сӯҷинаи шаҳри Панҷакент корхонаи истеҳсоли шиферро ифтитоҳ намуданд
Сарвари давлат Эмомалӣ Раҳмон дар деҳоти Лоиқ Шералии шаҳри Панҷакент Беморхонаи минтақавиро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар шаҳри Панҷакент МТМУ №115-ро ифтитоҳ намуданд