Кишоварзони Левакант 2411,2 тонна пахта ҷамъоварӣ намуданд

 ДУШАНБЕ, 07.10.2020 /АМИТ «Ховар»/. Кишоварзони шаҳри Левакант то охири моҳи сентябр ба хирмани мамлакат 2411,2 тонна пахта супориданд, ки ин 100,5 фоизи нақшаро ташкил медиҳад. Дар ин бора хабарнигори АМИТ «Ховар» бо истинод ба сомонаи мақомоти иҷроияи ҳокимияти давлатии шаҳри Левакант иттилоъ медиҳад.

Тавре аз бахши кишоварзии шаҳри Левакант хабар доданд, имсол деҳқонон нақша доштанд, ки 2410 тонна пахта ҷамъоварӣ намоянд.  Ҳосил дар саҳро назар ба солҳои гузашта фаровон мебошад ва аз ҳар гектар ба миқдори 22,2-сентнерӣ пахта ҷамъоварӣ гардид. Ҳоло маъракаи ҷамъоварии пахта идома дошта, хоҷагидорон кӯшиш карда истодаанд, ки пахтаи дар саҳробударо бе талаф ҷамъ оваранд.

Дар асоси маълумоти фаврии Раёсати тухмипарварӣ ва дастовардҳои селексионии Вазорати кишоварзии мамлакат оид ба ҷараёни ҷамъоварии ҳосили пахта дар шаҳру ноҳияҳои ҷумҳурӣ, то охири моҳи сентябр вилояти Хатлон 39,4 фоиз ва вилояти Суғд 19,3 фоизи нақшаи дурнаморо иҷро намудаанд.