Ситоди доимамалкунандаи Вазорати тандурустӣ ва ҳифзи иҷтимоии аҳолӣ дар як шабонарӯз се маротиба онлайн доир мегардад

ДУШАНБЕ, 09.10.2020 /АМИТ «Ховар»/.  Ситоди доимамалкунандаи Вазорати тандурустӣ ва ҳифзи иҷтимоии аҳолии  Ҷумҳурии Тоҷикистон оид ба пешгирии бемории коронавируси нави COVID-19 таҳти роҳбарии Вазири тандурустӣ ва ҳифзи иҷтимоии аҳолии мамлакат  Ҷамолиддин Абдуллозода дар як шабонарӯз се маротиба — соатҳои 08:00-и субҳ, 18:00-и бегоҳ ва 00:00-и шаб  тариқи онлайн доир мегардад. Дар ин бора АМИТ «Ховар» бо истинод ба Вазорати тандурустӣ ва ҳифзи иҷтимоии аҳолии ҷумҳурӣ хабар медиҳад.

Тамоми кормандони муассисаҳои кумаки аввалини  тиббию санитарӣ муваззаф гардидаанд, ки дар асоси нақшаи чорабиниҳои Вазорат  дар маҳалҳои аҳолинишин гардишҳои  хонагӣ анҷом  диҳанд. Аз ин рӯ, тибқи нақшаи чорабиниҳо,  сардорони раёсатҳои тандурустии вилоятҳо, роҳбарони муассисаҳои тандурустии шаҳру ноҳияҳои мамлакат ҳамарӯза  дар ҷаласаи ситод  ба таври онлайн иштирок намуда, аз натиҷаи гардишҳо ба роҳбарони  Вазорати тандурустӣ ва ҳифзи иҷтимоии аҳолии мамлакат  маълумот пешниҳод менамоянд.

Ҷамолиддин Абдуллозода ҳамарӯза ба масъалаҳои пешгирӣ, ташхис ва табобати гирифторони COVID-19 таваҷҷуҳи махсус зоҳир намуда, ҷиҳати боз ҳам пурзӯр намудани гардишҳои хонагӣ ба масъулин дастуру супоришҳои мушаххас медиҳад.

Ёдовар мешавем, ки ҳадафи асосии дар як шабонарӯз се маротиба баргузор шудани  ситоди вазорат ва гардишҳои ҳамарӯзаи хонагӣ дарёфти беморони COVID-19 ва сари вақт ба ташхису табобат фаро гирифтани онҳо мебошад.