«Парчам — рамзи ҳуввият ва иттиҳоди миллати тоҷик», таҳти ин унвон дар шаҳри Душанбе ба ифтихори Рӯзи Парчами давлатӣ чамъомади тантанавӣ доир гардид

Ноябрь 24, 2020 14:57

ДУШАНБЕ, 24.11.2020. /АМИТ «Ховар»/. Имрӯз ба ифтихори Рӯзи Парчами давлатии Ҷумҳурии Тоҷикистон дар Мақомоти иҷроияи ҳокимияти давлатии шаҳри Душанбе таҳти унвони «Парчам — рамзи ҳуввият ва иттиҳоди миллати тоҷик» ҷамъомади тантанавӣ доир гардид.

Дар ҷамъомад роҳбарият ва кормандони дастгоҳи Раиси шаҳр, инчунин намояндагони васоити ахбори омма иштирок намуданд.

Чорабинӣ бо садо додани суруди миллии Ҷумҳурии Тоҷикистон аз ҷониби иштирокчиён оғоз гардида,  ба  он муовини Раиси шаҳри Душанбе Мавсума Муинӣ бо сухани муқаддимавӣ ҳусни ифтитоҳ бахшид ва табрикоти Раиси шаҳри Душанбе муҳтарам Рустами Эмомалиро ба самъи ҳозирин  расонд.

Тавре дар ҷараёни чорабинӣ таъкид гардид, парчами давлатӣ  нишонаи бақои давлат, ваҳдату ягонагӣ, ҳувияти миллӣ ва беҳтарин василаи тарбияи наврасону ҷавонон дар рӯҳияи ифтихор аз давлатдории миллӣ ва ҳифзи арзишҳои таъриху фарҳанги халқамон ба шумор меравад.

Парчам ва ойини парчамдорӣ дар миёни мардуми куҳанбунёду тамаддунсози мо мақоми шоиста дошта, ҷузъи муҳимми фарҳанги давлатдории миллӣ ба ҳисоб меравад.

Бо дарназардошти муҳиммияти суннати парчамдорӣ баъди ба даст овардани истиқлолияти давлатӣ дар раванди ташаккули низоми давлатдории муосир баробар бо қабули Конститутсия ва дигар рамзҳои давлатӣ парчами кишвар ҳамчун нишонаи ҳастӣ ва пойдории давлатдории миллӣ қабул гардид.

Гузаштагони арҷманди мо ҳазорсолаҳо таҳти парчами хеш саф кашида, тамомияти арзӣ, ҳувияти миллӣ, ваҳдату ягонагӣ, нангу номус ва забону фарҳанги худро ҳимоя кардаанд. Яъне парчами давлатӣ барои мо як пораи одии матоъ набуда, балки дар он даъват ба муттаҳидӣ, ваҳдат, ғайрату номус, ватандӯстиву ватанпарастӣ, ҳимояи марзу бум ва саъю талош барои эъмори ҷомеаи адолатпарвар таҷассум гардидааст.

28 сол муқаддам, 24 ноябри соли 1992 дар иҷлосияи XVI таърихии Шӯрои Олии Тоҷикистон дар қатори дигар рамзҳо Парчами давлатии Тоҷикистон қабул гардид ва минбаъд ин сана ҳамчун Рӯзи Парчами давлатии Ҷумҳурии Тоҷикистон таҷлил мегардад.

Дар ин раванд, соли 2009 ба нишони эҳтирому арҷгузорӣ ба ин рамзи  нангу номуси ватандорӣ Парчами давлатии Тоҷикистон дар пояи баландтарин афрохта шуд, ки имрӯз мояи ифтихори ҳар як шаҳрванди бонангу номус буда, майдони ҷойгиршавии он макони дӯстдоштаи сокинону меҳмонони шаҳри Душанбе гардидааст.

Зимни баромади хеш маърӯзачиён таъкид доштанд, ки ҳамчун рамзи давлати соҳибистиқлол парчами миллии мо имрӯз дорои се ранг аст: сурх — рамзи муборизаву ҷоннисории халқ барои озодӣ ва истиқлол, ранги сафед — нишони бахту саодат, умеду орзу ва ранги сабз – нишонаи сарсабзиву шукуфоӣ, сарбаландӣ, хуррамӣ ва абадият мебошад.

Воқеан, парчами давлатии Тоҷикистони соҳибистиқлол мояи ифтихор ва сарфарозии ҳар як шаҳрванди худшиносу худогоҳ ва ватандӯсту ватанпарасти мамлакат ба ҳисоб рафта, 24-уми ноябри ҳар сол Рӯзи парчам бо камоли ифтихору эҳтиром нисбат ба яке аз рамзҳои давлати соҳибистиқлоламон таҷлил мегардад.

Сокинони шарафманди пойтахти азизамон-шаҳри Душанбе, бахусус насли ҷавону ояндасоз сиёсати бунёдкоронаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмонро ҳамаҷониба дастгирӣ намуда, хуб дарк кардаанд, ки эҳтироми Парчами давлатӣ маънои арҷгузориву ифтихор ба давлат, ба гузаштаву имрӯз ва фардои халқи азизамон буда, омили муҳимми таҳкими худшиносии миллӣ ва ифтихори ватандорӣ мебошад.

Дар зарфи бисту нӯҳ соли истиқлолият бо саъю талоши ватандӯстонаи кулли мардуми шарафманди тоҷик ва бахусус Аосгузори сулҳу Ваҳдати миллӣ-Пешвои миллат, Президенти Чумҳурии Тоҷикистон муҳтарам Эмомалӣ Раҳмон пойдевори устувори давлатдории миллӣ гузошта шуд. Ва минбаъд низ зери Парчами давлатӣ ояндаи дурахшон ва ободиву пешрафти ин сарзамин таъмин гардида, барои халқи азизи Тоҷикистон зиндагии пурсаодат фароҳам оварда мешавад.

Лозим ба таъкид аст, ки ба муносибати Рӯзи Парчами давлатии Ҷумҳурии Тоҷикистондар ҳамаи ташкилоту муассисаҳо  чорабиниҳои тантанавӣ баргузор шуда истодааст.

Ноябрь 24, 2020 14:57

Хабарҳои дигари ин бахш

ФАРҲАНГ ДАР РУШДИ ИНСОН МАҚОМИ АРЗАНДА ДОРАД. Муовини Раиси шаҳри Душанбе Мавсума Муинӣ доир ба афзалияти соҳаи фарҳанги пойтахт ибрози андеша намуд
Доир ба имконоти сайёҳӣ, заминаҳои воқеӣ ва дурнамои рушди шаҳри Душанбе ҳамоиш доир шуд
Ба 2500 нафар кӯдакони ятиму бепарастори пойтахт аз номи Раиси шаҳри Душанбе Рустами Эмомалӣ туҳфаҳои солинавӣ тақдим гардиданд
Ба зиёда аз 11 ҳазор нафар ниёзмандон кумакҳои Раиси шаҳри Душанбе Рустами Эмомалӣ тақдим шуданд
Имрӯз дар пойтахт Иҷлосияи ҳаштуми Маҷлиси вакилони халқи шаҳри Душанбе, даъвати шашум баргузор гардид
Дар Душанбе барномаҳои фарҳангии солинавӣ дар доираи маҳдуд гузаронида мешаванд
Дар Душанбе бахшида ба Соли нав ярмаркаҳои фурӯши маҳсулоти мавриди ниёзи аввал ташкил шудаанд
Дар Душанбе даври шаҳрии озмунҳои «Мураббии сол-2021», «Омўзгори сол-2021» ва «Хонандаи сол-2021» баргузор мегардад
ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар ноҳияи Синои пойтахт якчанд иншоот ба истифода дода шуд
«ДУШАНБЕ — ПОЙТАХТИ ФАРҲАНГИИ ИТТИҲОД-2021». Имрӯз дар Театри давлатии академии опера ва балети Тоҷикистон маросими натиҷагирӣ аз тадбирҳои андешидашуда доир гардид
«ДУШАНБЕ – ПОЙТАХТИ ФАРҲАНГИИ ИДМ-2021». Пагоҳ маросими расмии натиҷагирӣ аз тадбирҳои андешидашуда доир мегардад
Дар Душанбе тарабхонаи амрикоии зудхизматрасони KFC ифтитоҳ ёфт