Дабири кулли СММ аз хатари пайдоиши вирусҳои нави зоонозӣ ҳушдор медиҳад

ДУШАНБЕ, 03.12.2020 /АМИТ «Ховар»/.  Вирусҳои нави зоонозӣ (бемориҳои сироятӣ, ки аз ҳайвонот ба одамон мегузаранд), мисли коронавирус ба инсоният таҳдид мекунанд, агар мудохилаи одамон ба олами ҳайвонот қатъ нагардад. Дар ин бора Дабири кулли СММ Антонио Гутерриш зимни баромад дар Донишгоҳи Колумбия бо лексияи «Дар бораи вазъи сайёра» изҳор доштааст, хабар медиҳад АМИТ «Ховар» бо истинод ба ТАСС.

«То вақте ки одамон ва ҳайвоноти хонагӣ беш аз пеш ба муҳити зисти ҳайвоноти ваҳшӣ дастдарозӣ ва сарҳади табиати ваҳширо вайрон мекунанд, мо шоҳиди он мешавем, ки ҳарчи бештар вирусҳо ва дигар ангезандаҳои бемориҳо аз ҳайвонот ба одамон мегузаранд», — гуфт Дабири кулл.

Дар ин робита, Антонио Гутерриш даъват кард, ки фаромӯш набояд кард, ки 75% бемориҳои сироятии нави инсонӣ зоонозӣ мебошанд.

Раҳбари СММ инчунин гуфт, ки нишондиҳандаи калидии макроиқтисодӣ — маҷмӯи маҳсулоти дохилӣ (ММД) аҳамияти худро гум мекунад, чунки он зарар ба муҳити зистро ба инобат намегирад. «Теъдоди бештари одамон маҳдудияти меъёрҳои анъанавӣ, аз ҷумла ММД — ро, ки зимни онҳо фаъолият ба муҳити атроф зарар мерасонад, аз ҷиҳати иқтисодӣ фоиданок мешуморанд ва дарк мекунанд», — гуфт Дабири кулл.

«Тарзи тафаккур тағйир меёбад. Шумораи бештари одамон зарурати интихоби ҳаррӯзаи худро дар коҳиши осори карбон дарк мекунанд”, — зикр кард Антонио Гутерриш.

                                            ДАР АКС: Антонио Гутерриш. Акси EPA