Дар Кобул бар асари таркиши автомашинаи кормандони Идораи миллии омор ва иттилоот як нафар ҷон бохт

ДУШАНБЕ, 29.12.2020 /АМИТ «Ховар»/. Нимаи дуюми 28 декабр дар минтақаи Гузаргоҳи ноҳияи ҳафтуми шаҳри Кобул автомашинаи Идораи миллии омор ва иттилоот тарконда шуд, хабар медиҳад АМИТ «Ховар» бо истинод ба шабакаи телевизионии «Тулӯъ нюс».

Ба иттилои полиси Кобул, автомашинаи мазкур ҳадафи ҳамлаи ҷангҷӯён  қарор гирифта, мина дар як дучарха мустақар шуда буд.

Дар натиҷаи таркиш як тан ғайринизомӣ кушта ва панҷ нафари дигар маҷрӯҳ шуданд.

Бояд тазаккур дод, ки ин дуввумин таркиш дар як рӯз дар Кобул аст.

Тавре АМИТ «Ховар» қаблан хабар дода буд, таркиши аввал субҳи рӯзи душанбе дар як автомашинаи неруҳои амниятӣ дар Кобул рух дод.

Илова бар ин шабакаи телевизионии «Тулӯъ нюс» гузориш дод, ки 28 декабр «Толибон» (мамнӯъ дар Тоҷикистон) ба фармондеҳии полиси ноҳияи Анордараи вилояти Фароҳи Афғонистон ҳамла намуданд.

Мақомоти маҳаллии вилояти Фароҳ дар навбати худ хабар доданд, ки «Толибон» шаби гузашта автомашини пур аз маводи таркандаро дар назди идораи полиси ноҳияи Анордараи ин вилоят тарконидаанд.

Волии вилояти Фароҳ Тоҷмуҳаммад Ҷаҳид гуфт, ки пас аз таркиш «Толибон» ба маркази ноҳияи Анордара ҳамлаи густурдаро шурӯъ карданд.

Ба гуфтаи ӯ, дар ин ҳамла як корманди неруҳои амниятӣ кушта ва ду нафари дигар захмӣ шуданд.

Ба иттилои номбурда, ҳамлаи «Толибон» гардонида шуда, дар натиҷаи задухӯрд ва амалиёти неруҳои амниятӣ шумораи зиёди «Толибон» низ кушта шудаанд.

«Толибон» ҳанӯз ин ҳамларо шарҳ надодаанд.