Мақомот: 13 тан аз неруҳои амниятӣ дар ҳамлаи «Толибон» дар Бағлон ҷон бохтанд

ДУШАНБЕ, 18.12.2020 /АМИТ «Ховар»/. Мақомот меафзоянд, ки ин рӯйдод шаби гузашта дар мавзеъҳои Вазиробод ва Ниёзуллоҳи шаҳри Пули Хумрӣ ҳангоме рух дод, ки «Толибон» ба ду посгоҳ ҳамла намуданд, хабар медиҳад АМИТ «Ховар» бо истинод ба шабакаи телевизионии Афғонистон tolonews.com.

Мақомоти маҳаллии вилояти Бағлон 17 декабр эълом доштанд, ки дар ҳамлаи «Толибон» 13 тан аз неруҳои амниятӣ кушта ва чаҳор нафари дигар захмӣ шуданд.

Масъулон афзуданд, ки ин ҳодиса шаби гузашта дар мавзеъҳои Вазиробод ва Ниёзуллоҳи Пули Хумрӣ ҳангоми ҳамлаи «Толибон» ба ду посгоҳ рух додааст.

Посгоҳҳои мавриди ҳамла қароргирифта аз идораи  полиси Бағлон ҳамагӣ се километр фосила доранд.

Ҷасадҳои қурбониёнро имрӯз ба хонаводаҳояшон супурданд, аммо наздикони онҳо интиқод мекунанд, ки фармондеҳии полиси Бағлон сари вақт ба посгоҳҳо кумак накардааст.

Масъулияти ҳамларо «Толибон» бар дӯш гирифтанд.