Роҳбари дафтари СУТ дар Аврупо оид ба буҳрони солимии равонии аҳолӣ назарашро баён намуд

ДУШАНБЕ, 21.12.2020 /АМИТ «Ховар»/. Тарси сироятёбӣ, андешаи саломатии наздикон, карантин, бекорӣ, мушкилоти молиявӣ, маҳдудияти иҷтимоӣ –ин ҳама таъсири оқибатҳои пандемия, ба назари коршиносон, дар солимии рӯҳии аҳолӣ муддати дароз эҳсос хоҳад шуд. Дар ин бора рӯзи шанбе, 19 декабр, роҳбари Бюрои Аврупоии Созмони умумиҷаҳонии тандурустӣ доктор Ҳанс Клюге изҳор кардааст, хабар медиҳад АМИТ «Ховар» бо истинод ба Маркази ахбори СММ.

Вай ёдовар шуд, ки тибқи пурсишҳое, ки Созмони Байналмилалии меҳнат гузаронидааст, ҳар дуввумин ҷавони 19-29- сола изтироб ё афсурдаҳолиро аз сар мегузаронад. Ин раванд ба гуфтаи намояндаи СУТ, ба гурӯҳҳои синну соли дигар низ дахл дорад. Дар моҳҳои зимистон ин гуна бетобиҳо дар маҷмӯъ аксар вақт шиддат мегиранд ва дар пасманзари пандемия, онҳо метавонанд боиси хатари бештар ба саломатии одамон гарданд.

«Дар арафаи идҳо туҳфаи беҳтарин метавонад ҳифзи солимии равонӣ ва некӯаҳволии мо, инчунин ғамхорӣ нисбат ба дигарон бошад», — мегӯяд Клюге. Вай пешниҳод мекунад, ки захираҳои иҷтимоӣ барои дастгирии гурӯҳҳои аз ҳама осебпазири аҳолӣ сафарбар карда шаванд. Ғайр аз ин, роҳбари Дафтари Аврупоии СУТ аз ҳукуматҳои минтақа даъват кард, ки барномаҳои ҳифзи солимии рӯҳии одамонро маблағгузорӣ кунанд. СУТ гузаронидани идҳоро дар хона тавсия медиҳад.

«Ҳоло кори аз ҳама бехатар- ин ҷашн гирифтани идҳо дар хона аст», — ташвиқ кард доктор Ҳанс Клюге. — Дар хотир доред, ки ҳатто ҳангоми аз наздиконатон ҷудо будан ҳам шумо набояд эҳсоси танҳоӣ кунед: муошират кунед, мукотиба кунед, занг занед, якдигарро дастгирӣ кунед”!

«Ҳоло чизи асосӣ амният ва саломатӣ аст», — зикр кард ӯ. — Ваксинаҳо дар роҳанд, аз ин рӯ мо метавонем ба ояндаи беҳтар умедвор бошем. Мо бояд чанд моҳи дигар тоқат кунем, баъдан мо ифтихор хоҳем кард, ки масъулият нишон додем».

ДАР АКС: оқибатҳои пандемия ба солимии равонии аҳолӣ таъсир мерасонанд: Истанбул, Туркия, ҳангоми карантин (бойгонӣ). Акси ЮНИСЕФ