Афроди мусаллаҳи ношинос як корманди дафтари волии Ғазниро куштанд

ДУШАНБЕ, 26.02.2021 /АМИТ «Ховар»/. Мақомоти вилояти Ғазнии Афғонистон гуфтаанд, ки мардони мусаллаҳи ношинос як корманди дафтари волиро ба қатл расонидаанд, хабар медиҳад АМИТ «Ховар» бо истинод ба сомонаи “Садои Амрико” дар Афғонистон www.darivoa.com.

Сухангӯи волии Ғазнӣ Ваҳидуллоҳ Ҷумъазода 25 феврал ба «Садои Амрико» гуфтааст, ки Муҳаммад Мӯсо Ахлоқӣ, сардори танзими маҷлисҳои волии Ғазнӣ тавассути ашхоси номаълум кушта шудааст.

Сухангӯи волии Ғазнӣ гуфт, ки Ахлоқӣ, ки нимаи дуюми рӯзи панҷшанбе бо писараш аз минтақаи Қалъаи Амир Муҳаммадхони маркази Ғазнӣ мегузашт, ҳадафи тирандозии мардони мусаллаҳ қарор гирифт. Вай афзуд, ки писари ҷаноби Ахлоқӣ дар ин ҳодиса захмҳои шадид бардоштааст.

Ҷаноби Ҷумъазода ин ҳамларо ба «Толибон» (мамнуъ дар Тоҷикистон) нисбат дод ва гуфт, ки мошини Ахлоқиро ҷангҷӯён бо худ бурдаанд.

Муҳаммадмӯсо Ахлоқӣ як фаъоли сиёсӣ дар вилояти Ғазнӣ буд ва қаблан роҳбарии дафтари вилоятии Ҳизби исломии Афғонистонро бар уҳда дошт.

Дар рӯйдоди мушобеҳ силоҳбадастони мототсиклсавор субҳи 25 феврал  дар Парвони Афғонистон як корманди амнияти миллиро бо зарби гулӯла куштанд.

Абдул Шакур Қудусӣ, вулусволи Багром гуфтааст, ки ҳодиса соати 8:45 дар деҳаи Алихонхели ноҳия рух додааст.

То ҳанӯз касе масъулияти ин ду рӯйдодро ба дӯш нагирифтааст.