Дар автомашинаи раиси дафтари Вазири давлат дар умури сулҳ дар Кобул таркиш рух дод

ДУШАНБЕ, 01.02.2021 /АМИТ «Ховар»/ Пулиси Кобули Афғонистон мегӯяд, ки субҳи имрӯз як мошини Land Cruiser дар минтақаи Чорроҳаи шаҳиди ноҳияи даҳуми Кобул дар  минаи канори шоҳроҳ таркид, хабар медиҳад АМИТ «Ховар» бо истинод ба шабакаи телевизионии tolonews.com.

Масъулони амниятӣ имрӯз (душанбе, 1 феврал) гуфтанд, ки автомашинаи Хушнуд Набизода, раиси дафтари Саъодат Мансур Нодирӣ, вазири давлат дар умури сулҳ, таркидааст.

Полиси Кобул мегӯяд, ки субҳи имрӯз як Land Cruiser дар мавзеи Чорроҳаи шаҳиди ноҳияи даҳуми Кобул ҳадафи минаи канори шоҳроҳ қарор гирифт. Аммо ба гуфтаи пулис, ин инфиҷор хисороту талафоти ҷонӣ надоштааст.

Наздикони Набизода мегӯянд, ки ҳангоми таркиш ҷаноби Набизода, ду фарзандаш ва ронандаи онҳо дар мошин буданд, аммо ба онҳо осеб нарасидааст.

То акнун ҳеҷ гурӯҳе, аз ҷумла “Толибон” (мамнуъ дар Тоҷикистон), масъулияти таркишро ба уҳда нагирифтааст.