Дар Санкт-Петербург ҷаласаи Шӯрои ҳамоҳангсозии ҷамъияти тоҷикон баргузор гардид

ДУШАНБЕ, 05.02.2021 /АМИТ «Ховар»/. Ҷаласаи Шӯрои ҳамоҳангсозии ҷамъияти тоҷикон дар Санкт-Петербург ва вилояти Ленинград 4 феврал дар Хонаи миллатҳои шаҳри Санкт-Петербург баргузор шуд.

Тавре котиби матбуоти Маҷлиси намояндагони Маҷлиси Олии Ҷумҳурии Тоҷикистон иттилоъ медиҳад, дар ҷаласа Консули генералии Ҷумҳурии Тоҷикистон дар Санкт-Петербург Ҳомидҷон Назарӣ, намояндаи ваколатдори Маҷлиси Олии Ҷумҳурии Тоҷикистон дар Ассамблеяи байнипарлумонии Иттиҳоди Давлатҳои Мустақил Бахтовар Сафарзода, намояндаи Вазорати  меҳнат, муҳоҷират ва шуғли аҳолии Тоҷикистон дар Санкт-Петербург Шодибой Тураев, раисони ҷамъиятҳо, ҳамоҳангсозон ва аъзои шӯрои ҳамоҳангсозӣ иштирок намуданд.

Дар ҷараёни ҷаласа Консули генералии Ҷумҳурии Тоҷикистон дар Санкт-Петербург Ҳомидҷон Назарӣ зикр кард, ки ҳамаи кормандони консулгарӣ тайёранд дар ҳар ҳолат ба ҳамватанон оид ба тамоми масъалаҳои ба миён омада кумак расонанд. Барои шаҳрвандони Тоҷикистон, ки дар ҳудуди Санкт-Петербург зиндагӣ мекунанд, риояи қонунҳои Федератсияи Россия аҳамияти калон дорад.

Намояндаи Маҷлиси Олӣ дар Ассамблеяи байнипарлумонии Иттиҳоди Давлатҳои Мустақил Бахтовар Сафарзода тезисҳои муҳимеро, ки дар Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон иброз шуда буданд, ба самъи ҳозирин расонида, дар бораи самтҳои асосии сиёсати дохилӣ ва хориҷии ҷумҳурӣ суҳбат намуд ва илова кард, ки ҳамватанони мо бояд бо ҳамаи одамони Санкт-Петербурги сермиллат робитаи хуб дошта бошанд.

Бахтовар Сафарзода иброз дошт, ки имрӯз миёни ҷавонон кор бурдан лозим аст, то онҳо ба созмонҳои террористӣ ва экстремистӣ шомил нашаванд.

Дар ҷаласа нақшаи кори Шӯрои ҳамоҳангсозии ҷамъияти  тоҷикон дар Санкт-Петербург ва вилояти Ленинград барои соли 2021 тасдиқ карда шуд.