Сироҷиддин Муҳриддин: «Беш аз 260 нафар занону кӯдакони Тоҷикистон дар урдугоҳҳои Сурия қарор доранд»

ДУШАНБЕ, 15.02.2021 /АМИТ «Ховар»/. «Ҳоло дар урдугоҳҳои Ал-Ҳавл ва Ар-Равҷи Сурия беш аз 260 нафар занону кӯдакони Тоҷикистон қарор доранд», — гуфт Вазири корҳои хориҷии ҷумҳурӣ Сироҷиддин Муҳриддин имрӯз зимни нишасти матбуотӣ.

Ба гуфтаи ӯ, бо супориши Пешвои миллат, Президенти Ҷумҳурии Тоҷикистон барои баргардонидани занону кӯдакони тоҷик аз кишварҳои ҷангзадаи Ховари Миёна ба Ватан дипломатҳои тоҷик моҳи декабри соли 2020 ба Сурия, аз ҷумла ба урдугоҳҳои ал-Ҳавл ва ар-Равҷ сафари корӣ анҷом дода, зимни он бо шаҳрвандони кишвари мо вохӯрданд. Барои баргардонидани шаҳрвандони мо аз Сурия корҳо идома доранд.

«Вазорат дар ин самт ба Сафири Тоҷикистон дар Давлати Кувайт ваколат дод, ки ӯ ҳамзамон Сафири Тоҷикистон дар Сурия мебошад. Вазорати корҳои хориҷии Тоҷикистон бо Ҳукумати Сурия ҳамкории зич дорад», — гуфт Сироҷиддин Муҳриддин.