Даври сеюми олимпиадаҳои фаннии хонандагони муассисаҳои таълимии шаҳри Душанбе ҷамъбаст гардид

ДУШАНБЕ, 04.03.2021 /АМИТ «Ховар»/. 3 март дар Литсейи №3 барои хонандагони болаёқати шаҳри Душанбе маросими ҷоизасупорӣ ба ғолибони даври сеюми (шаҳрии) олимпиадаҳои фаннии хонандагони муассисаҳои таълимии шаҳри Душанбе аз рӯйи шаш номинатсия — «Беҳтарин дастаи олимпии ноҳияи шаҳри Душанбе», «Даҳгонаи беҳтарин дастаи олимпии муассисаҳои таълимии шаҳри Душанбе», «Ғолибони даври сеюми олимпиадаи фаннии хонандагон», «Ғолибони даври шаҳрии олимпиадаи «Speeling Bee», «Ғолибони даври шаҳрии олимпиада оид ба «Шоҳмот» ва «Ғолибони олимпиадаи даставии «Истеъдод» баргузор гардид.

Тавре аз Сараёсати маорифи шаҳри Душанбе ба АМИТ «Ховар» иттилоъ доданд, аз рӯйи номинаи «Беҳтарин дастаи олимпии ноҳияи шаҳри Душанбе» зинаи аввалро дастаи олимпии ноҳияи Сино бо 351 ҷойи ифтихорӣ, зинаи дуюмро дастаи олимпии ноҳияи Фирдавсӣ бо 171 ҷойи ифтихорӣ, мавқеи сеюмро дастаҳои олимпии ноҳияи Шоҳмансур бо 158 ҷойи ифтихорӣ ва ноҳияи Исмоили Сомонӣ бо 137 ҷойи ифтихорӣ ишғол намуда, бо ҷоизаҳо сарфароз гардонида шуданд.

Муовини раиси шаҳри Душанбе Мавсума Муинӣ зимни ифтитоҳи маросим иброз дошт, ки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатиашон ба Маҷлиси Олии кишвар ба хотири боз ҳам беҳтар ба роҳ мондани омӯзиши илмҳои табиатшиносӣ, дақиқ ва риёзӣ, инкишофи тафаккури техникии насли наврас солҳои 2020-2040-ро «Бистсолаи омӯзиш ва рушди фанҳои илмҳои табиатшиносӣ, дақиқ ва риёзӣ дар соҳаи маориф» эълон карданд. Барои расидан ба ин ҳадафҳо дар кишвар ҳамасола озмунҳои шаҳрӣ (ноҳиявӣ), вилоятӣ ва ҷумҳуриявӣ дар ҳамаи зинаҳои таҳсилот баргузор гардида, ғолибон аз ҷониби вазорату идораҳо, мақомоти иҷроияи ҳокимияти давлатии вилоятҳо ва шаҳру ноҳияҳо аз ҷиҳати маънавию моддӣ қадрдонию ҳавасманд гардонида шаванд.

Аз рӯи номинаи «Даҳгонаи беҳтарин дастаи олимпии муассисаи таълимии шаҳри Душанбе» аз ҳисоби муассисаҳои таҳсилоти миёнаи умумии пойтахт Муассисаи таҳсилоти миёнаи умумии №55 бо 23 ҷойи ифтихорӣ, Муассисаи таҳсилоти миёнаи умумии №8 бо 21 ҷойи ифтихорӣ, Муассисаи таҳсилоти миёнаи умумии №56 бо 19 ҷойи ифтихорӣ, Муассисаи таҳсилоти миёнаи умумии №16 бо 17 ҷойи ифтихорӣ, Муассисаи таҳсилоти миёнаи умумии №21 бо 16 ҷойи ифтихорӣ ва аз ҳисоби литсей ва гимназияҳои пойтахт Литсей барои хонандагони болаёқати шаҳри Душанбе бо гирифтани 55 ҷойи ифтихорӣ, Литсей-интернати Президентӣ бо ба даст овардани 53 ҷойи ифтихорӣ, Литсейи №3 барои хонандагони болаёқати шаҳри Душанбе бо гирифтани 47 ҷойи ифтихорӣ, Гимназияи №74 бо ба даст овардани 40 ҷойи ифтихорӣ, Гимназияи №1 барои хонандагони болаёқати шаҳри Душанбе бо соҳиб шудани 33 ҷойи ифтихорӣ дастаҳои беҳтарини олимпии муассисаҳои таълимӣ дониста шуда, бо ҷоизаҳо сарфароз гардиданд.

Бояд гуфт, ки дар ҷумҳурӣ бори нахуст Олимпиадаи даставии «Истеъдод» бахшида ба «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» бо шакл ва услуби нав баргузор карда шуд. Дар натиҷа дастаи муассисаҳои таҳсилоти миёнаи умумии ноҳияи Шоҳмансур сазовори ҷойи аввал дониста шуд. Аз ҳисоби литсей ва гимназияҳо дастаи ноҳияи Исмоили Сомонӣ соҳиби ҷойи аввал дониста шуда, сазовори Ҷоми Олимпиадаи даставии «Истеъдод» гардид.

Дар даври сеюми олимпиадаи шаҳрӣ 3017 нафар иштирок намуданд, ки 841 нафарро ғолибони даври сеюми (шаҳрии) олимпиадаҳои фаннии хонандагони муассисаҳои таълимии пойтахт ташкил доданд. Аз ин 161 нафар хонандагони синфи 11, 108 нафар ғолибони олимпиадаи даставии хонандагони синфҳои 9-10, 112 нафар наврасони синфҳои 7-8, 85 нафар хонандагони синфҳои 5-6, 12 нафар ғолибони олимпиадаи «Speeling Вee», 12 нафар ғолибони олимпиада оид ба «Шоҳмот» ба даври чоруми (ҷумҳуриявии) олимпиадаҳо роҳхат гирифтанд.

Маркази рушди истеъдодҳои назди Сарраёсати маорифи шаҳри Душанбе олимпиадаҳои фаннии хонандагонро дар ҳамаи зинаҳои муассисаҳои таҳсилоти шаҳри Душанбе дар пойтахт ва ноҳияҳои он марҳила ба марҳила роҳандозӣ намуд.

Маркази мазкур ташкил ва баргузор намудани олимпиадаҳои фаннӣ ва ҳавасмандгардонии иштирокчиёни онҳоро яке аз усулҳои босамари дастгирӣ ва ҷалб кардани хонандагони болаёқат ба донишандӯзӣ ва илмомӯзӣ мешуморад.