«Шарбат» ғолиби даври шаҳрии Озмуни «Беҳтарин тарабхона дар Душанбе» гардид

ДУШАНБЕ, 20.03.2021 /АМИТ «Ховар»/.  Тарабхонаи «Шарбат» ғолиби даври шаҳрии Озмуни «Беҳтарин тарабхона дар шаҳри Душанбе» дониста шуд. Роҳбарияти он бо ҷоизаи ғолиби озмуни «Беҳтарин тарабхонаи шаҳри Душанбе дар соли 2020» ва диплому туҳфаҳои хотиравии Мақомоти иҷроияи ҳокимияти давлатии шаҳри Душанберо қадрдонӣ гардид. Тарабхонаҳои «Яккасарой», «Дидор», «Шаҳрисабз» ҷойҳои ифтихорӣ муносиб гашта, ба онҳо низ сипосномаю туҳфаҳои хотиравии Мақомоти иҷроияи ҳокимияти давлатии шаҳри Душанбе тақдим карда шуданд.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд,  озмуни мазкур  дар асоси Қарори Раиси шаҳри Душанбе аз 16 феврали соли 2021 бо мақсади рушду равнақи соҳибкорӣ, дастгириву ҳавасмандгардонии соҳибкорон, беҳтаргардонии сифати хизматрасонӣ ва муаррифии фарҳанги меҳмоннавозӣ роҳандозӣ гардида буд.

Дар асоси Низомномаи озмун, зимни баҳогузорӣ а ҷониби ҳакамон тарзи дастархонороӣ, хизматрасонии пешхизмат, муносибати пешхизматону масъулини тарабхонаҳо бо мизоҷон,  дурусти оро додани дастархон бо маҳсулоти хӯрока бо истифодаи санъати баланди ороишӣ, ғояҳои мухталифи сарошпаз ва дигар нишондодҳо ба инобат гирифта шуданд. Инчунин муҳити тарабхона низ бояд хушоянду дилписанд бошад.

Даври ноҳиявии Озмуни «Беҳтарин тарабхона дар шаҳри Душанбе» ҳанӯз оғози моҳи март ҷамъбаст гардида, ғолибон ба даври шаҳрӣ пешниҳод гардида буданд. Ҷамъбасти озмун дар асоси хулосаи ҳайати комиссияи даври шаҳрии Озмуни «Беҳтарин тарабхона дар шаҳри Душанбе» баргузор карда шуд.