СУРАТ-ДАЛЕЛ. Корҳои ороишии Майдони «Дӯстӣ»-и пойтахт бахшида ба ҷашни Наврӯз анҷом ёфтанд

ДУШАНБЕ, 16.03.2021 /АМИТ «Ховар»/. Корҳои ороишиии майдони «Дӯстӣ»-и пойтахт бахшида ба Иди Наврӯзи байналмилалӣ анҷом ёфтанд.

Дар паҳлӯи муҷассамаи шоҳ Исмоили Сомонӣ  рамзи баҳору Наврӯз — табақи сабзаи суманак қомат афрохт. Баландии сабзаи суманак 30 метр ва паҳноии табақи он 16 метрро  ташкил медиҳад. Инчунин дар  майдон, дар паҳлӯи ин рамзи наврӯзӣ, дастурхон бо дарозии 10 метр ва паҳноии 6 метр густурда ва он тибқи  анъанаи асосӣ ва қадимаи ҷашни Наврӯз — «ҳафт син» ва «ҳафт шин» ороста  шудааст.

Дар  майдон ҳамчунин дарахтони пургул, гулҳои рангоранг  ва дигар ороишоти наврӯзӣ насб  гардидаанд. Девораи намоиши гулҳои баҳорӣ бо дарозии 45 метр ва баландии 3 метр — аз навгониҳои дигар дар ин майдон бахшида ба ҷашни пуршукӯҳи ниёгон мебошад. Дар майдон инчунин конструксияи наврӯзӣ бо кураи Замин ва навиштаҷоти «Наврӯз муборак!» гузошта шуд.