Бар асари афтидани мушак ба бинои маъмурии вилояти Кунари Афғонистон 14 нафар захмӣ шуданд
![](https://khovar.tj/wp-content/uploads/2021/04/6D40AA78-5E06-4938-B926-636FC8321C64_w1023_r1_s.jpg)
ДУШАНБЕ, 27.04.2021 /АМИТ «Ховар»/. Мақомоти маҳаллии вилояти Кунари Афғонистон гузориш доданд, ки як мушак ба бинои маъмурии вилоят бархӯрд ва дар натиҷаи таркиши он 14 нафар захмӣ шудаанд, хабар медиҳад АМИТ «Ховар» бо истинод ба сомонаи “Садои Амрико” дар Афғонистон www.darivoa.com.
Азиз-ур-Раҳмон Сопӣ, сардори Раёсати тандурустии вилояти Кунар, 26 апрел ба «Садои Амрико» гуфт, ки то ҳол 14 нафар маҷрӯҳон аз ҷои ҳодиса ба бемористон интиқол дода шудаанд.
Ҷаноби Сопӣ афзуд, ки ҳамаи маҷрӯҳон ғайринизомиён буданд ва вазъи чаҳор нафари онҳо вазнин аст.
Дар ҳамин ҳол, дафтари матбуоти волии Кунар бо нашри як иттилоия гуфтааст, ки мушак замоне ба бинои маъмурии вилоят афтод, ки дар толори умумии он мусобиқаи қироати Қуръони карим сурат мегирифт.
Дар иттилоия омадааст, ки дар ин ҳодиса се қории Қуръон ва ду созмондиҳандаи мусобиқа низ маҷрӯҳ шуданд.
Дафтари матбуоти волии Кунар дар ин ҳодиса «Толибон» -ро (мамнӯъ дар Тоҷикистон) айбдор кардааст.
Масъулияти ҳамларо то ҳол ҳеҷ гурӯҳе бар дӯш нагирифтааст ва «Толибон» дар ин бора изҳори назар накардаанд.