«Усто Набот» ва «Сангчашма» вориди бозори сайёҳии Тоҷикистон гардиданд

Апрель 11, 2021 09:24

ДУШАНБЕ, 11.04.2021 /АМИТ «Ховар»/. Ду ширкати нави сайёҳӣ- «Усто Набот» ва «Сангчашма» дар шаҳри Ҳисор вориди бозори туристии Тоҷикистон гардиданд, иттилоъ медиҳад АМИТ «Ховар» бо истинод ба Кумитаи рушди сайёҳии назди Ҳукумати ҷумҳурӣ.

Ба ин ду ширкати сайёҳии навтаъсис дар доираи баргузории ҳамоиш дар мавзӯи «Имконияти рушди сайёҳии шаҳри Ҳисор», ки бо ибтикори Кумитаи рушди сайёҳӣ дар ҳамкорӣ бо Мақомоти иҷроияи ҳокимияти давлатии шаҳри Ҳисор бо ҷалби субъектҳои фаъолияти сайёҳӣ доир гардид, иҷозатномаи фаъолияти сайёҳӣ дода шуд. Ҳадафи таъсиси ширкатҳои нави сайёҳӣ мусоидат дар роҳ ёфтани рақобати озоду солим дар бозори сайёҳии кишвар арзёбӣ мегардад.

Дар ҳамоиш, ки бо мақсади татбиқи ҳадафҳои Солҳои рушди деҳот, сайёҳӣ ва ҳунарҳои мардумӣ гузаронида шуд, Раиси Кумитаи рушди сайёҳии назди Ҳукумати ҷумҳурӣ Тоҷиддин Ҷӯразода ва Раиси шаҳри Ҳисор Шарифҷон Ҷумъазода иштирок намуданд.

Зикр шуд, ки сайёҳӣ яке аз соҳаҳои муҳими иқтисодиёти ҳар давлат маҳсуб ёфта, дар тӯли даҳсолаҳо новобаста ба буҳронҳои иқтисодию молиявӣ, таҳаввулоти сиёсӣ ва тағйироти иҷтимоӣ бо суръат ва устувор рушд намуда, дар таъмини шуғл ва баланд бардоштани сатҳи зиндагии мардум нақши муҳим дорад.Аз ин рӯ, татбиқи идоракунии самараноки сиёсати давлатии соҳа аз ҷумлаи афзалияти муҳими сиёсати иқтисодию иҷтимоии рушди Ҷумҳурии Тоҷикистон ба ҳисоб меравад.

Дар ин ҷода маҳз бо дастгириву ташаббусҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар қатори соҳаҳои дигари иқтисодиву иҷтимоӣ дар соҳаи сайёҳӣ низ ислоҳоти муҳим амалӣ карда шуданд, ки ба рушди устувори соҳа замина гузоштааст. Айни замон мо метавонем ҳама гуна сайёҳонро дар сатҳи барои онҳо муносиб қабул карда, ба онҳо хизмат расонем. Яке аз монеаҳое, ки то имрўз вуҷуд дорад, ин ҳамкории нокифоя байни ширкатҳои сайёҳӣ ва иншооти инфрасохторӣ дар маҳал аст.

Аз ҷониби Кумита ташкили сафари роҳбарони ширкатҳои сайёҳӣ ба минтақаҳо ва гузаронидани ҳамоишу мизҳои мудаввар бо мақсади ба роҳ мондани ҳамроҳии зич ва дар ин замина шинос шудан бо иншооти нави хизматрасонӣ, ки дар доираи татбиқи ҳадафҳои Солҳои рушди деҳот, сайёҳӣ ва ҳунарҳои мардумӣ ва бахшида ба ҷашни 30- солагии Истиқлоли давлатии Ҷумҳурии Тоҷикистон бунёд ва мавриди баҳрабардорӣ қарор дода шудаанд, амалӣ карда мешавад.

Дар ҳамоиш масъалаҳои тайёр намудани роҳбаладони касбӣ, зимни муаррифии мавзеъҳо такя намудан ба маълумоти аз ҷиҳати илмӣ асоснок, гузаронидани корҳои илмӣ-тадқиқотӣ дар мавзеъҳои сайёҳӣ, ташаккули фарҳанги сайёҳӣ, рушди сайёҳии дохилӣ ва дигар масъалаҳои марбут ба рушди самараноки фаъолияти сайёҳӣ мавриди баррасӣ қарор дода шуданд.

Инчунин масъулини мақомот ва роҳбарони субъектҳои хизматрасонӣ вобаста ба имконияти мусоиди ҷалби сармоягузории дохилию хориҷӣ ба рушди инфрасохтори соҳаи сайёҳӣ дар шаҳри Ҳисор, иқтидорҳои табиӣ, экологӣ, аграрӣ ва таърихию фарҳангии шаҳр ҳамчун омили рушди туризми экологию аграрӣ, фарҳангию этнографӣ ва имконоти ташкили хатсайрҳои нави сайёҳӣ мубодилаи афкор намуданд. Иштирокдорони ҳамоиш аз бархе хатсайрҳои сайёҳӣ ва марказҳои хизматрасонӣ ба сайёҳону меҳмонон, аз ҷумла Маҷмааи хизматрасонии фароғатии «Шаршара», осоишгоҳи «Сангчашма» ва меҳмонхонаи «Усто Набот» боздид намуда, бо сатҳи хизматрасонии онҳо шинос гардиданд.

Аксҳои Кумитаи рушди сайёҳии назди Ҳукумати ҶТ

Апрель 11, 2021 09:24

Хабарҳои дигари ин бахш

Соли 2023 ба буҷети шаҳри Гулистон аз ҳисоби хизматрасонии сайёҳӣ ва табобатӣ зиёда аз 40 миллион сомонӣ ворид шуд
«НАВРӮЗ — МЕРОСИ ФАРҲАНГИЮ ҶАҲОНГАРДӢ». Табиати зебои Тоҷикистон дили меҳмонони хориҷиро тасхир намуд
Ба шарафи Наврӯзи бостонӣ дар Кумитаи рушди сайёҳии Тоҷикистон ҳамоиши тантанавӣ доир шуд
Коршиносони олмонӣ дар ҷашни наврӯзии Донишгоҳи байналмилалии сайёҳӣ ва соҳибкории Тоҷикистон иштирок намуданд
Дар шаҳри Душанбе Фестивали байналмилалии «Наврӯз-мероси фарҳангию ҷаҳонгардӣ» баргузор гардид
Дар Боғи Ирами шаҳри Душанбе Фестивали байналмилалии «Наврӯз-мероси фарҳангию ҷаҳонгардӣ» бо намоиши ҳунарҳои мардумӣ доир гардид
Дар Намоишгоҳи байналмилалии сайёҳӣ ва меҳмоннавозии Москва имконоти сайёҳии Тоҷикистон муаррифӣ гардид
Масъалаи тақвияти ҳамкории Тоҷикистон ва Ҷопон дар соҳаи сайёҳӣ мавриди баррасӣ қарор гирифт
Ҷаласаи нуҳуми Шурои ҳамоҳангсозии миллӣ оид ба рушди соҳаи сайёҳӣ дар назди Ҳукумати Ҷумҳурии Тоҷикистон баргузор гардид
ФОРУМИ B5+1. Ҳамгироии иқтисодии минтақавии Осиёи Марказӣ тавассути муколамаи давлатӣ ва бахши хусусӣ тақвият меёбад
Дар шаҳраки бостонии Саразм майдони пазироӣ, дарвозаи рамзӣ ва терминали логистикӣ сохта мешавад
РӮЗИ МАТБУОТИ ТОҶИК. Кумитаи рушди сайёҳии Тоҷикистон заҳмати як зумра рӯзноманигоронро қадрдонӣ намуд