Пешвои миллат Эмомалӣ Раҳмон дар хоҷагии деҳқонии «Абдулло»-и ноҳияи Данғара ба маъракаи ҷамъоварии ҳосили ғалла оғоз бахшиданд

Июнь 17, 2021 11:32

ДУШАНБЕ, 17.06.2021 /АМИТ «Ховар»/. 17 июн Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар хоҷагии деҳқонии “Абдулло”-и ноҳияи Данғара ба маъракаи ҷамъоварии ҳосили ғалла оғоз бахшиданд.

Хоҷагии деҳқонии “Абдулло” дар деҳоти Сафобахш ҷойгир буда, соли 2005 таъсис ёфтааст ва дар ихтиёри худ 88 гектар замини обӣ ва 46 саҳмдор дорад. Саҳмдорони хоҷагӣ ҳар қитъа заминро бо самар истифода бурда, ҳамасола ҳосили хуби маҳсулоти гуногуни кишоварзӣ, аз ҷумла ғалла ба даст меоранд.

Ба Пешвои миллат муҳтарам Эмомалӣ Раҳмон иттилоъ доданд, ки дар мавсими кишти тирамоҳӣ кишоварзони хоҷагӣ дар масоҳати 40 гектар гандуми навъи “Алекс” ва “Краснодар-99” кишт гузаронданд ва акнун, умед доранд, ки аз ҳар гектар замин ба ҳисоби миёна 35-40 сентнерӣ гандум рӯёнанд. Ба гуфти хоҷагидорон боду ҳавои мусоиди имсола ба ҳосилнокии ғалла ва дигар навъи маҳсулот таъсири мусбат расондааст. Дар хоҷагии деҳқонии “Абдулло” дар баробари ғаллакорӣ, дар 5 гектар ҷав, 30 гектар пахта, 2 гектар полезӣ, 1 гектар картошка, 2 гектар зироати равғандеҳи маъсар ва дар 2 гектар юнучқа барои хӯроки чорво кишт карда шудааст.

Дар 8 гектар боғ бунёд шудааст, ки дар он дарахтони ҳосилдеҳ, аз ҷумла себу нок, нашпотӣ, гелосу олу ва бодом мавҷуд аст. Кишоварзон нақша доранд, ки баъд аз ҷамъоварии ҳосили гандум дар кишти такрорӣ ҷуворимакка коранд. Айни замон пахтаи хоҷагӣ нашъунамои хуб дошта, кишоварзон чигити навъи “Флеш” ва “Флора” кишт кардаанд. Интизор меравад, ки аз ҳисоби интихоби тухмии баландсифат дар мавсими ҷамъоварии ҳосил пахтаи фаровон низ ба даст оварда шавад.

Ба иттилои маъсулон дар ҳудуди деҳоти Сафобахши ноҳияи Данғара 315 адад хоҷагии деҳқонӣ, аз ҷумла 8 кооперативи тиҷоратӣ мавҷуд аст. Заминҳои умумии деҳот 3 ҳазору 5 95 гектарро дар бар гирифта, 1 ҳазору 870 гектари онро замини корами обӣ ташкил медиҳад. Аз ин шумора 182 гектар, аз ҷумла 70 гектар замини обӣ ба хоҷагиҳои ёрирасони шахсӣ шомил аст. Аҳли заҳмати деҳоти Сафобахши ноҳияи Данғара бештар ба ғаллакорӣ машғул буда, имсол дар масоҳати 1 ҳазору 506 гектар замин гандум кишт карда, имрӯзҳо маъракаи ҷамъоварии ҳосил бо маром идома дорад. Деҳқонон ҳосили дигар навъи маҳсулоти кишоварзӣ, аз ҷумла сабзавоту полезиро низ ҷамъоварӣ доранд, то дар ғанӣ гардондани сабади истеъмолии ҷумҳурӣ ҳиссагузор бошанд.

Кулли сокинони мамлакат дастуру ҳидоятҳои Сарвари давлат муҳтарам Эмомалӣ Раҳмонро вобаста ба истифодаи босамари замин, аз ҷумла қитъаҳои наздиҳавлигӣ ба хушнудӣ пазируфта, ҳамасола аз ҳар як қитъа замин то 3 ҳосил ба даст оварда, барои солҳои минбаъда маҳсулоти ғалладонагӣ ба монанди гандум, наску нахуд, мошу лубиё ва дигар навъи зироатро захира менамоянд.

Ин таҷриба дар ҳудуди ноҳияи Данғара баръало ба назар мерасад. Таҷрибаи зиёди заминдорӣ ва риояи қоидаҳои агротехникӣ дар вақти кишту парвариши маҳсулоти гуногуни кишоварзӣ имкон медиҳад, ки ҳосили дилхоҳ рӯёнида шуда, фаровонии бозори истеъмолии дохилӣ таъмин карда шавад.

Мавриди зикр аст, ки кишоварзони ботаҷрибаи ноҳияи Данғара ҳамасола аз ҳисоби кишту парвариш ва истеҳсоли маҳсулоти кишоварзӣ дар таъмини амнияти озуқавории мамлакат ҳиссаи арзишманд мегузоранд.

Боздид аз ҷамъоварии ғалла дар хоҷагии деҳқонии “Абдулло”-и деҳоти Сафобахши ноҳияи Данғара 17.06.2021

Июнь 17, 2021 11:32

Хабарҳои дигари ин бахш

Дар Душанбе ҷаласаи ҳаштуми гурӯҳи коршиносони минтақавӣ оид ба беҳдошти устуворӣ ба офатҳои табиӣ ба анҷом расид
Дар Душанбе бахшида ба Рӯзи байналмилалии мубориза бар зидди коррупсия ҳамоиш доир шуд
Ҳангоми истифодаи хабару маводи сомона истинод ба www.khovar.tj ҳатмӣ аст!
Дар Бадахшон хизматчиёни давлатӣ соҳиби хонаҳои хизматӣ гардиданд
Дар павилиони миллии Тоҷикистон дар СОР 28 дар мавзуи «Шаҳри сабз» ҳамоиш баргузор гардид
Бунёди бинои баландошёна дастрасии сокинони шаҳри Хоруғро ба манзили истиқоматӣ осон мегардонад
Ҳайати Корея бо сохторҳои Вазорати меҳнат, муҳоҷират ва шуғли аҳолӣ дар вилояти Хатлон шинос шуд
Тоҷикистон ва Эрон ҳамкориро дар самти мубориза бо ҷинояткорӣ ва таҳкими амният густариш медиҳанд
Пешвои миллат Эмомалӣ Раҳмон дар маҷлиси Кумитаи иҷроияи марказии Ҳизби Халқии Демократии Тоҷикистон иштирок намуданд
ТАМОШОИ ЁДГОРИҲОИ ТАЪРИХӢ БО ВОЛИДАЙН. Ба ҳукми анъана даромадани он дар тарбияи ватандўстии фарзандон нақши муҳим мегузорад
Масъалаи дар асоси шартнома бо кор таъмин намудани шаҳрвандони Тоҷикистон дар Ҷумҳурии Корея баррасӣ гардид
Дар Маҷлиси намояндагон «Барномаи давлатии ҳифзи мероси таърихию фарҳангӣ барои солҳои 2021-2025» мавриди баррасӣ қарор гирифт