Россия мехоҳад муҳоҷирони Тоҷикистонро аз карантини ҳатмӣ озод кунад

ДУШАНБЕ, 04.06.2021 /АМИТ «Ховар»/. Интизор меравад, ки мушкилоти вуруди муҳоҷирони меҳнатӣ ба қаламрави Россия аллакай тобистони имсол ҳал гардад, гуфт вазири сохтмон ва хоҷагии манзилию коммуналӣ Ирек Файзуллин ба РИА «Новости» дар ҳошияи Форуми байналмилалии иқтисодии Санкт-Петербург.

«Агар қарорро ман қабул мекардам, ҳамин ҳоло иҷозат медодам (вуруд – тавз.). Ҳоло танҳо гуфта метавонам, ки мо кушиш ба харҷ медиҳем, ки мавсими тобистонро аз даст надиҳем», — тазаккур дод вазир.

Файзуллин илова кард, ки мақомот имкони ба карантини ҳатмӣ фаро нагирифтани муҳоҷирони меҳнатиро, ки ташхиси манфии реаксияи занҷири полимеразӣ (ПТР) доранд, пас аз вуруд ба Россия баррасӣ менамоянд.

Инчунин ба гуфтаи ӯ, корфармоёни калон бояд эмгузаронии коргаронро ташкил кунанд.

Вазир ба мушкили нақлиёт барои вуруди муҳоҷирон низ ишора кард. Пас, ба ақидаи ӯ, парвозҳо аз Тоҷикистон ва Ӯзбекистон ҳафтае як маротиба кифоя нестанд.

Ба гуфтаи ӯ, ширкатҳои ҳавопаймоӣ омодаанд, ки баъд аз иҷозати Ситоди оперативӣ оид ба пешгирӣ аз воридот ва паҳншавии сирояти нави коронавирус дар Федератсияи Росия шумораи парвозҳоро зиёд намоянд.

Дар ҳамин ҳол, қаблан муовини сарвазир Марат Хуснуллин норасоии муҳоҷиронро дар сохтмонҳо вазъи  ташвишовар  номид.

Ба гуфтаи ӯ, мақомоти Россия сабукии қоидаҳои мавҷудаи убури марзро барои хориҷиёне, ки ба Федератсияи Россия барои кор дар бахши сохтмон меоянд, омода мекунанд.

АКС аз манобеи боз