Дар деҳаи Чуқуркати шаҳри Турсунзода корҳои омодагӣ ба ҷашни 30-солагии Истиқлоли давлатӣ вусъат меёбанд

ТУРСУНЗОДА, 05.07.201 /АМИТ «Ховар»/. Сокинони бо нангу номуси деҳаи Чуқуркати Ҷамоати деҳоти «10-солагии Истиқлолият»-и шаҳри Турсунзода бо рӯҳияи  баланди ватандӯстӣ ҷиҳати сазовор пешвоз гирифтани ҷашни  30-солагии Истиқлоли давлатии Ҷумҳурии Тоҷикистон корҳои созандагию ободониро вусъат мебахшанд. Соҳибкорон, фаъолон ва сокинони ҷамоати деҳоти  мазкур  бунёди 29 иншоотро ба нақша гирифта, дар доираи тадбирҳои ҷашнӣ 21 иншоотро мавриди баҳрабардорӣ қарор додаанд. Дар 8 иншооти дигар  корҳои сохтмонӣ бомаром идома доранд.

Бо мақсади тарғибу ташвиқи тарзи ҳаёти солим ва беҳтар намудани шароити таълиму тарбияи насли наврас имрӯзҳо дар деҳа сохтмони толори варзишӣ ва бинои синфхонаҳои иловагӣ дар ҷараён аст. Сокинони ин деҳа ният доранд, ки сохтмони иншооти мазкурро бо сифати баланд ба итмом расонида,  мавриди истифодаи  насли наврас қарор диҳанд.

Раиси шаҳри Турсунзода Парвиз Акрамзода дар мулоқот ба сокинони ин деҳа миннатдории худро ҷиҳати саҳми арзанда гузоштан  дар таҷлили ҷашни 30-солагии Истиқлоли давлатӣ баён намуда, ба ҳалли масъалаҳои ҷудо намудани қитъаи замин барои сохтмони маркази хизматрасонӣ ва мағоза, таъмини аҳолӣ бо оби нӯшокӣ, дастрасӣ намудани сутунпояҳои оҳанию бетонӣ барои интиқоли неруи барқ, расонидани кумаки моддӣ барои табобат, ҳуҷҷатнигорӣ намудани  манзилҳои истиқоматӣ ва бунёди майдончаи варзишӣ мусоидат намуда, ба масъулини вобаста ба сари вақт мавриди баррасӣ қарор додани арзу дархости шаҳрвандон супориш дод.

Аксҳо аз Мақомоти иҷроияи ҳокимияти давлатии шаҳри Турсунзода