Шумораи қурбониёни обхезӣ дар Чин ба 63 нафар расид

ДУШАНБЕ, 26.07.2021 /АМИТ «Ховар»/. Шумораи қурбониён бар асари бориши шадид ва обхезӣ дар музофоти Хэнани Чин ба 63 нафар расида, 5 каси дигар бедарак шуданд. Мақомот беш аз 860 ҳазор нафарро аз минтақаҳои хавфнок кӯчонданд, хабар медиҳад РИА «Новости» бо истинод ба ҳукумати музофот.

«Аз 16 июл то соати 12:00-и 25 июл, бар асари бориши тӯлонӣ, 11,44 миллион нафар дар минтақаи офатзада қарор доштанд. Шумораи қурбониён ба 63 нафар расида, 5 нафар бедарак шуданд. Дар саросари музофот 861,9 ҳазор нафар аллакай ба ҷойҳои бехавф таҳвил дода шуданд».

Бештар аз 296 ҳазор нафар ба кумаки фаврӣ ниёз доранд.

Масоҳати замини киштзори зарардида 876,6 ҳазор гектарро ташкил дода, 8876 бино валангор шуд.

Мақомоти маҳаллӣ дар саросари музофот сатҳи вокуниши ҳолатҳои фавқулодаро ба офатҳои табиӣ ба сатҳи баландтарин бароварданд ва қариб 200,000 нафар, аз ҷумла оташнишонон ва наҷотдиҳандагон дар мубориза бо обхезӣ, корҳои ҷустуҷӯӣ ва наҷотбахшӣ ва рафъи оқибатҳои офатҳо ширкат доранд.

Дар бисёр маҳалҳои музофот, алалхусус дар шаҳри Чжэнчжоу, ҳанӯз ҳам дар ҳама ҷо таъминоти барқ ​​ва об ба роҳ монда нашуда, алоқа дар як қатор минтақаҳо то ҳол барқарор нагардидааст.

Боронҳои шадиди 17 июл дар музофоти Хэнан ба амал омаданд. Аз ҳама бештар шаҳри Чженчжоу хисорот дид. Баъзе истгоҳҳои обу ҳавои шаҳр сабти таърихии бориши миёнаи шабонарӯзиро ба қайд гирифтанд.

АКС аз Reuters