Дар Душанбе озмуни нон ва маҳсулоти нонӣ баргузор гардид

Август 13, 2021 09:36

ДУШАНБЕ, 13.08.2021. /АМИТ «Ховар»/. 12 август дар Муассисаи давлатии «Боғи фарҳангию фароғатии ба номи Абулқосим Фирдавсӣ»-и шаҳри Душанбе озмуни нон ва маҳсулоти нонӣ таҳти унвони «Нон шудам, шоистаи ҳар хон шудам» баргузор гардид. Дар озмуни  мазкур нонпазҳо ба сокинону меҳмонони пойтахт тарзи тайёр кардани нони  тоҷикӣ, аз қабили нони чаппотӣ, сатрӣ, кулчаи хурду калон, фатир, таҳмол, орзуқ, фатири қад-қад, қалама, ҳалвои сурху сафед ва дигар маҳсулоти аз орди гандум тайёршавандаро пешниҳод  намуданд.

Дар озмун намояндагони Мақомоти иҷроияи шаҳри Душанбе иштирок намуда, аз ороиши дастурхони намояндагони ноҳияҳои пойтахт дидан карданд ва ба ҳунари волои кадбонувони тоҷик баҳои баланд  доданд.

Муовини Раиси шаҳри Душанбе Мавсума Муинӣ зикр кард, ки  лаззати нони тоҷикӣ ва ҳунари нонпазии  бонувони тоҷик дар ҷаҳон ҳамто надорад. Ҳадаф аз баргузории маъракаи имрӯза ҳам арҷгузорӣ ба ҳунари нонпазӣ, тарғиби нони тоҷикӣ, дарёфти беҳтарин нонпазҳо,  эҳёи анъанаҳои миллӣ ва оммавӣ гардонидани суннатҳои беҳтарини нонпазии ниёгон, намоиши пухтани навъҳои гуногуни нони минтақаҳои мамлакат, ҳавасмандкунии шаҳрвандон барои сарфакорона ва моҳирона пухтани навъҳои гуногуни нони минтақаҳои ҷумҳурӣ, ба наслҳои оянда мерос гузоштани тарзу усули пухтани он, ҳарчӣ бештар эҳё ва тарғибу ташвиқ кардани намудҳои нон иборат мебошад.

Мавриди зикр аст, ки бо қарори Раиси шаҳри Душанбе Рустами Эмомалӣ аз 10 августи соли 2021  ҳайати аъзои гурӯҳи корӣ ва нақшаи чорабиниҳо оид ба омодагӣ ва  баргузории озмуни мазкур тасдиқ гардид.  Иқдоми мазкур бо мақсади иҷрои банди 28 ҷадвали баргузории фестивал, намоиш, ид ва озмунҳои анъана ва ҳунарҳои мардумӣ дар Ҷумҳурии Тоҷикистон барои солҳои 2019-2021, ки бо Амри Президенти Ҷумҳурии Тоҷикистон аз 27 январи соли 2020 тасдиқ гардидааст, роҳандозӣ мегардад.

Даврҳои якум ва дуюми озмун тибқи муқаррароти Низомномаи озмуни ҷумҳуриявии нон ва маҳсулоти нонӣ таҳти унвони «Нон шудам, шоистаи ҳар хон шудам» дар Ҷумҳурии Тоҷикистон барои соли 2021, ки бо фармоиши Роҳбари Дастгоҳи иҷроияи Президенти Ҷумҳурии Тоҷикистон аз 10 июни соли 2019  тасдиқ шудааст, ташкилу баргузор карда мешаванд.

Ёдовар мешавем, ки тӯли чанд сол аст, дар пойтахт Озмуни маҳсулоти нонӣ таҳти унвони «Нон шудам, шоистаи ҳар хон шудам»,  «Оши палав», фестивали «Хӯрокҳо ва пуфакҳои ҳавоӣ», фестивали баҳории хӯрокҳои миллӣ, «Хӯришҳои миллӣ», «Яхмос ва обҳои ташнагишикан» ва дигар иду ҷашнҳо бо шукӯҳи хосса баргузор мегардад.

 

АКСҲО: АМИТ «Ховар»

Август 13, 2021 09:36

Хабарҳои дигари ин бахш

Дар нахустин Намоишгоҳи байналмилалии сайёҳии Душанбе-2024 зиёда аз 110 ширкати сайёҳӣ ва намояндагони 16 давлат иштирок намуданд
Нахустин Намоишгоҳи байналмилалии сайёҳии Душанбе-2024 оғоз ёфт
Ҳасани Саъдидӣ аз Эрон: «Шаҳри Душанбе гавҳари арзишманд дар қалби Осиёи Марказӣ аст»
Дар доираи Намоишгоҳи байналмилалии сайёҳии Душанбе-2024 Форуми байналмилалии сайёҳии Душанбе оғоз ёфт
Намоишгоҳи байналмилалии сайёҳии Душанбе-2024 оғоз гардид
Имрӯз дар Душанбе Намоишгоҳи якуми байналмилалии сайёҳии Душанбе-2024 оғоз мегардад
Дар Душанбе Намоишгоҳи якуми байналмилалии сайёҳии Душанбе-2024 доир мегардад
Маҷмуи масоили ҳамкорӣ байни Душанбе ва Шероз баррасӣ шуд
Иҷлосияи нуздаҳуми Маҷлиси вакилони халқи шаҳри Душанбе, даъвати шашум баргузор мегардад
Маркази кӯдакон ва наврасони шаҳри Душанбе хонандагонро ба омӯзиши илму ҳунар ва донишҳои замони муосир ҷалб менамояд
СОЛИ МАЪРИФАТИ ҲУҚУҚӢ. Бахшида ба он дар Душанбе ҳамоиш доир шуд
Дар Душанбе даври шаҳрии Озмуни ҷумҳуриявии «Илм-фурӯғи маърифат» оғоз гардид