Дар Душанбе видеоконференсияи ҷаласаи ҳаждаҳуми вазирони фарҳанги кишварҳои узви СҲШ баргузор шуд
ДУШАНБЕ, 18.08.2021 /АМИТ «Ховар»/. 18 август дар шаҳри Душанбе ҷаласаи ҳаждаҳуми вазирони фарҳанги кишварҳои узви Созмони Ҳамкории Шанхай дар шакли видеоконференсия баргузор гардид.
Тавре хабарнигори АМИТ “Ховар” хабар медиҳад, дар ҷаласаи мазкур вазири давлатии фарҳанги Ҷумҳурии Ҳиндустон Арҷун Рам Мегвал, вазири фарҳанг ва варзиши Ҷумҳурии Қазоқистон Актотӣ Раимқулова, муовини вазири фарҳанг ва сайёҳии Ҷумҳурии Мардумии Чин Чжан Сю, вазири фарҳанг, иттилоот, варзиш ва сиёсати ҷавонони Ҷумҳурии Қирғизистон Қайрат Иманалиев, вазири мероси миллӣ ва фарҳанги Ҷумҳурии Исломии Покистон Шафкат Маҳмуд, муовини вазири фарҳанги Федератсияи Русия Олга Ярилова, вазири фарҳанги Ҷумҳурии Тоҷикистон Зулфия Давлатзода ва вазири маданияти Ҷумҳурии Узбекистон Озодбек Назарбеков фаъолона ширкат варзиданд. Инчунин дар ҷаласаи мазкур Дабири кулли СҲШ Владимир Норов низ иштирок дошт.
Ҷаласа таҳти раёсати Вазири фарҳанги Ҷумҳурии Тоҷикистон Зулфия Давлатзода роҳандозӣ гардид.
Вазирони фарҳанги кишварҳои узви Созмони ҳамкории Шанхай дар фазои дӯстӣ ва ҳамдигарфаҳмӣ вазъ ва дурнамои рушди ҳамкориро дар соҳаи фарҳанг дар доираи СҲШ муҳокима карданд. Ҳамзамон оид ба иҷрои Созишнома байни ҳукуматҳои давлатҳои узви СҲШ дар соҳаи фарҳанг (ш. Бишкек, 16 августи соли 2007) ва созишномаҳои вохӯриҳои гузаштаи вазирони фарҳанг мубодилаи афкор намуданд.
Тарафҳо ба ҷонибдории рушди минбаъдаи робитаҳои фарҳангии бисёрҷониба ва дуҷониба дар чаҳорчӯбаи Созмон, таҳкими ҳамдигарфаҳмӣ миёни мардум, нигоҳдории гуногунрангии фарҳангҳо, эҳтироми якдигар ва паҳн кардани дониш дар бораи анъана ва урфу одатҳои халқҳое, ки дар фазои СҲШ зиндагӣ мекунанд, сухан гуфтанд.
Кори созандаи Гурӯҳи кории коршиносон оид ба ҳамкории фарҳангӣ дар доираи СҲШ қайд карда шуд.
Таъкид шуд, ки мулоқоти вазирони фарҳанги кишварҳои узви Созмони ҳамкории Шанхай барои мубодилаи афкор оид ба рушди ҳамкории дуҷониба ва бисёрҷонибаи фарҳангӣ имконияти хуб фароҳам овардааст.
Онҳо омодагии худро барои роҳандозӣ ва рушди ҳамкорӣ дар соҳаи фарҳанг бо давлатҳои нозир ва созмонҳои муколамаи СҲШ изҳор намуданд.
Ҷонибҳо ба Вазорати фарҳанги Ҷумҳурии Тоҷикистон барои меҳмоннавозии гарм ва ташкили нишасти вазирони фарҳанги кишварҳои узви Созмони Ҳамкории Шанхай изҳори сипос мекунанд. Онҳо инчунин изҳори умедворӣ карданд, ки ҷаласаи навбатии вазирон дар шакли мулоқоти шахсӣ баргузор мешавад.
Тавофуқ ҳосил шуд, ки ҷаласаи навбатии вазирони фарҳанги кишварҳои узви Созмони Ҳамкории Шанхай дар соли 2022 дар Ҷумҳурии Узбекистон баргузор шавад.
АКСҲО: АМИТ “Ховар”
Пешвои миллат Эмомалӣ Раҳмон: «24 ёдгории таърихию фарҳангии Тоҷикистон ба Феҳристи мероси моддии ҷаҳонии ЮНЕСКО сабт гардидааст»
Президенти Тоҷикистон: «Мо барои арҷгузорӣ ба арзишҳои асили тамаддуни тоҷикону форсизабонон иқдомоти муассирро амалӣ намудем»
ШЕЪР ВА ИСТИҚЛОЛ. Назми муосири тоҷик дар солҳои соҳибистиқлолии Тоҷикистон дар сафи пеши худшиносии миллӣ ва ҳаракати ваҳдати миллӣ қарор гирифт
Кормандони соҳаи фарҳанг бо мукофотҳои давлатӣ сарфароз гардиданд
Се китоби рӯзномаи «Ҷумҳурият»: «Эмомалӣ Раҳмон ва эҳёи тамаддуни ориёӣ», «Бозгашти қаҳрамон» ва «Бозгашти қаҳрамон 2» муаррифӣ гардид
Конференсияи ҷумҳуриявии «Забон рукни муҳимми Истиқлоли давлатӣ ва ҳамбастагии ҷомеа» баргузор гардид
Дар Озмуни байналмилалии «Санъати китоб» «Шоҳнома»-и Абулқосим Фирдавсӣ сазовори Шоҳҷоиза гардид
35 СОЛИ СОҲИБИСТИҚЛОЛӢ. Дар Тоҷикистон соли 1991 танҳо 15 театр фаъолият мекард
«Эмомалӣ Раҳмон — муаррифгари таърихи ниёгон ва тамаддуни навини тоҷикон». Таҳти ин унвон китоб ба нашр расид
Дар шаҳри Душанбе маҳфили «Шоҳномахонӣ» баргузор шуд
«ТОҶИ СОМОН». Қабули филмҳо барои иштирок дар синамоҷашнвораи миллӣ то 15 сентябр идома меёбад
«МОДАРНОМА». Дар Осорхонаи миллӣ намоиши асарҳои Рассоми халқии Тоҷикистон Сабзаалӣ Шариф ифтитоҳ ёфт
