Дар Хатлон дар ҳашт моҳ ҳаҷми истеҳсоли маҳсулоти кишоварзӣ ба 12,1 миллиард сомонӣ расонида шуд

ДУШАНБЕ, 19.09.2021. /АМИТ «Ховар»/.  Дар вилояти Хатлон давоми ҳашт моҳи соли равон дар ҳамаи шаклҳои хоҷагидории вилоят ҳаҷми истеҳсоли маҳсулоти кишоварзӣ 12,1 миллиард сомониро ташкил дода, дар муқоиса нисбат ба ҳамин давраи соли гузашта ба 106,1 фоиз баробар гардид. Афзоиши маҷмӯи умумии маҳсулот дар соҳаи растанипарварӣ 106,2 фоиз ва чорводорӣ 105,4 фоиз таъмин карда шуд, иттилоъ доданд аз шуъбаи иттилоотию таҳлилии дастгоҳи Раиси вилояти Хатлон ба АМИТ «Ховар».

Дар маҷмӯи умумии истеҳсоли маҳсулоти кишоварзии ҷумҳурӣ ҳиссаи вилояти Хатлон 50,5 фоизро ташкил дод.

Ҳамчунин дар доираи иҷрои дастуру супоришҳои Ҳукумати Ҷумҳурии Тоҷикистон оид ба истифодаи самараноку оқилонаи заминҳои корам солҳои 1991-2020 майдони кишти гандум 2,1 маротиба, шолӣ 2,3 маротиба, лӯбиёгиҳо 2,4 маротиба, ҷуворимакка барои дон 2,6 маротиба, картошка 2,9 маротиба, сабзавот 3,5 маротиба ва полезӣ 2,1 маротиба зиёд гардида, ҳосилнокии онҳо аз 2 то 5 баробар афзоиш ёфтааст.

Дар иқтисодиёти вилоят яке аз самтҳои афзалиятноку калидӣ соҳаи кишоварзӣ ба ҳисоб меравад ва кишоварзони вилоят дар миқёси ҷумҳурӣ ҷиҳати истеҳсоли маҳсулоти рақобатпазиру ба содирот пешбинишуда ва таъмини амнияти озуқаворӣ саҳми босазо доранд.

АКС:  шуъбаи иттилоотию таҳлилии дастгоҳи раиси вилояти Хатлон