Саидмурод Фаттоҳзода бо Чэн Дайвэн мулоқоти судманд анҷом дод

Сентябрь 1, 2021 16:18

ДУШАНБЕ, 01.09.2021 /АМИТ «Ховар»/.  Раиси кумитаи Маҷлиси намояндагон оид ба корҳои байналмилалӣ, иттиҳодияҳои ҷамъиятӣ ва иттилоот Саидмурод Фаттоҳзода бо мушовир оид ба масъалаҳои сиёсии Сафорати Ҷумҳурии Мардумии Чин дар Ҷумҳурии Тоҷикистон Чэн Дайвэн мулоқот намуд, иттилоъ дод ба хабарнигори АМИТ «Ховар» котиби матбуоти Маҷлиси намояндагони Маҷлиси Олии Ҷумҳурии Тоҷикистон Муҳаммадато Султонов.

Раиси кумитаи Маҷлиси намояндагон нахуст ба меҳмон дар бораи фаъолияти Маҷлиси намояндагони Маҷлиси Олии Ҷумҳурии Тоҷикистон маълумоти муфассал дода, ҳамзамон изҳор дошт, ки барои мо мояи ифтихори бузург аст, ки Парлумони мамлакатамон бо бештари парламентҳои кишварҳои мутараққии ҷаҳон, аз ҷумла Маҷлиси умумичинии намояндагони халқи Ҷумҳурии Мардумии Чин ҳамкорӣ ва муносибати хуб дорад. Бо мақсади рушди ҳамкории дуҷонибаи байнипарлумонӣ дар Маҷлиси намояндагон гурӯҳи дӯстӣ ва ҳамкорӣ бо парламенти Чин таъсис дода шудааст.

«Бо таваҷҷуҳ ба иқтидори бузурги иқтисодӣ, сиёсӣ ва низомӣ, мавқеи ҷуғрофӣ ва соҳиби таҷрибаи ғании азнавсозии кишвар, қабл аз ҳама, вобаста ба гузариш ба муносиботи бозорӣ Ҷумҳурии Мардумии Чин дар сиёсати хориҷии Ҷумҳурии Тоҷикистон мавқеи арзишмандро ишғол менамояд»,- гуфт раиси кумитаи Маҷлиси намояндагон ва афзуд, ки анҷоми боздидҳои бесобиқаи расмӣ ва дӯстонаи Сарони ду кишвар ба ҷумҳуриҳои ҳамдигар, имзои асноди гуногуни ҳамкорӣ, ки барои мардум ва миллати ин кишварҳо тақдирсоз буда, асоси баробарҳуқуқӣ, ҳамсоягии ҳасана, эҳтироми байниҳамдигарӣ, эътимод ва мавқеъҳои муштаракро дар бар мегиранд, нишонаи мавҷуд будани ҳамкории дӯстона ва дорои сатҳи баланд мебошад.

Саидмурод Фаттоҳзода изҳори боварӣ кард, ки риштаи дӯстӣ ва ҳамкорӣ байни ҷумҳуриҳои мо то ҳадде қавӣ аст, ки дар ин миён ҳеҷ гуна мушкилоти ҳалношуда вуҷуд надорад. Раиси кумитаи Маҷлиси намояндагон изҳор дошт, ки ҳоло дар Ҷумҳурии Тоҷикистон бо кумак ва сармояи Ҷумҳурии Мардумии Чин зиёда аз 100 тарҳи муштарак дар бахшҳои иқтисод, бахусус дар заминаи энергетика ва коммуникатсия дар ҳоли иҷро қарор доранд. То кунун дар Ҷумҳурии Тоҷикистон корхонаҳои муштараки Чин ва Тоҷикистон ба нафъи мардум фаъолият доранд.

Изҳори боварӣ карда шуд, ки вохӯрии имрӯза барои таҳкими муносиботи Ҷумҳурии Тоҷикистон ва Ҷумҳурии Мардумии Чин дар ҳамаи соҳаҳо заминаи тоза фароҳам хоҳад овард.

Мушовир оид ба масъалаҳои сиёсии Сафорати Ҷумҳурии Мардумии Чин дар Ҷумҳурии Тоҷикистон Чэн Дайвэн низ аз сатҳи ҳамкории кишвараш бо Ҷумҳурии Тоҷикистон дар тамоми соҳаҳо изҳори қаноатмандӣ намуда, ҳамзамон иброз дошт, ки Ҷумҳурии Мардумии Чин дорои зарфияти бештари барқарории равобит бо Ҷумҳурии Тоҷикистон мебошад ва ин кишвар ҳар замон омода аст, ки аз ин зарфият барои миллату мардуми Тоҷикистони дӯсту ҳамҷавор истифода намояд.

Дар мулоқот дигар масъалаҳои мавриди таваҷҷуҳи тарафайн мавриди баррасӣ қарор гирифтанд.

 АКС аз Маҷлиси намояндагон

Сентябрь 1, 2021 16:18

Хабарҳои дигари ин бахш

Ҳайати парлумонии Тоҷикистон дар Форуми байналмилалии «Мероси бузург – ояндаи муштарак» дар Волгоград иштирок менамояд
Раиси Маҷлиси намояндагон бо Сафири Чин дар Тоҷикистон мулоқот намуд
Дар иҷлосияи навбатии Маҷлиси намояндагон лоиҳаи якчанд қонун баррасӣ карда шуд
Файзалӣ Идизода бо Сафири Русия дар Тоҷикистон Семён Григорйев мулоқот намуд
Раиси Маҷлиси намояндагон бо Сафири Шоҳигарии Арабистони Саудӣ мулоқот намуд
Рустами Эмомалӣ дар ҷаласаи тантанавии Ассамблеяи Байнипарламентии давлатҳои иштирокчии ИДМ ба муносибати 80-солагии Ғалаба иштирок намуданд
Раиси Маҷлиси миллии Маҷлиси Олӣ дар кори ҷаласаи 58-уми пленарии Ассамблеяи Байнипарламентии давлатҳои ИДМ иштирок намуданд
Рустами Эмомалӣ бо Раиси Сенати Парламенти Қазоқистон Маулен Ашимбаев мулоқот намуданд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ дар маросими гулгузорӣ дар оромгоҳи ёдгории Пискарёв иштирок намуданд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ дар ҷаласаи Шурои Ассамблеяи Байнипарламентии давлатҳои иштирокчии ИДМ иштирок ва суханронӣ намуданд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ бо Раиси Сенати Олий Мажлиси Ҷумҳурии Узбекистон Танзила Нарбаева мулоқот намуданд
Раиси Маҷлиси миллии Маҷлиси Олӣ Рустами Эмомалӣ бо Раиси Шурои Федератсияи Маҷлиси Федералии Русия Валентина Матвиенко мулоқот намуданд