Вазорати корҳои хориҷии Тоҷикистон ба сафири ИМА дар робита ба суханони Ҷо Байден ёддошти эътирозӣ супурд

Сентябрь 14, 2021 13:20

ДУШАНБЕ, 14.09.2021 /АМИТ «Ховар»/. 14 сентябр Сафири Фавқулода ва Мухтори Иёлоти Муттаҳидаи Америка дар Ҷумҳурии Тоҷикистон Ҷон Марк Поммершайм ба Вазорати корҳои хориҷии Ҷумҳурии Тоҷикистон даъват гардид. Ба Сафири ИМА оид ба суханони Президенти Иёлоти Муттаҳидаи Амрико Ҷо Байден зимни боздид аз дидбонгоҳи оташнишонӣ дар Пенсилвания ёддошти эътирозӣ супорида шуд. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Дар ёддошт омадааст, ки чунин суханҳо ба рӯҳияи муносибатҳои дӯстона ва шарикӣ ҷавобгӯ намебошанд.

Инчунин  зикр шудааст, ки ҷониби Ҷумҳурии Тоҷикистон ҳавасманди пешбурди робитаҳои судманд бо Иёлоти Муттаҳидаи Амрико дар рӯҳияи ёрӣ ва эҳтироми ҳамдигар аст.

Мавриди ёдоварист, ки Президенти ИМА Ҷо Байден 11 сентябри соли равон ҳангоми боздид аз дидбонгоҳи оташнишонӣ дар Пенсилвания аз амалҳои худ дар мавриди хуруҷи неруҳо аз Афғонистон дифоъ карда, яке аз лаҳзаҳои фоҷианокро, ки афғонҳо зимни кӯшиши тарки кишвар ба фюзеляж (танаи самолёт) ва чархҳои ҳавопаймоҳои дар ҳоли парвоз мечаспиданд ва аз баландӣ афтода, ҳалок шуданд, зикр намуд.

Байден изҳор дошт, ки вазъият бо одамоне, ки ба фюзеляжҳои ҳавопаймоҳои низомӣ-нақлиётии Амрико часпиданд, дар сурати тахлияи ҷонибдорони ИМА аз Тоҷикистон метавонист такрор шавад.

«Ба касе фаҳмондан душвор аст, ки ба таври дигар чӣ гуна метавон тарк кард. Масалан, агар мо дар Тоҷикистон мебудем ва ҳавопаймои C-130 (ҳавопаймои низомӣ-нақлиётӣ) оварда, мегуфтем, ки мо ба ҳамаи онҳое, ки ҷонибдори моянд, иҷоза медиҳем ба ҳавопаймо савор шаванд, шумо одамонро дар чарҳо овезон медидед», — гуфт аз ҷумла, Президенти ИМА.

  АКС: Sputnik/ thepavlovictoday.com

Сентябрь 14, 2021 13:20

Хабарҳои дигари ин бахш

Тоҷикистон барои рушди устувор ва иқтисоди «сабз» бо Комиссияи иқтисодии СММ ҳамкорӣ менамояд
Тоҷикистон дар таҳкими ҳамкории сиёсӣ, иқтисодӣ ва башардӯстона дар доираи ИДМ саҳми назаррас дорад
Аҳмад ибни Муҳаммад Ас-Сайид: «Робитаҳои иқтисодии Тоҷикистону Қатар муҳим арзёбӣ мегарданд»
Қоҳир Расулзода бо Валиаҳди Салтанати Негери Сембилани Малайзия Шоҳзода Тунку Алӣ Ризауддин ибни Муҳри мулоқот намуд
Холид Ал-Фолеҳ: «Арабистони Саудӣ дар Тоҷикистон беш аз 14 лоиҳаро тавассути Фонди саудии рушд амалӣ намудааст»
Намояндаи Тоҷикистон дар Форум оид ба сиёсати бетарафӣ, зеҳни сунъӣ (AI) ва ояндаи рақамӣ иштирок намуд
Сафири Тоҷикистон дар Конгресси ҷаҳонӣ оид ба ҳифзи табиат дар Абу Забӣ иштирок намуд
Сироҷиддини Муҳриддин: «Музокироти сарони кишварҳои ИДМ дар фазои созандаю самарабахш ва корӣ баргузор шуд»
Сергей Лебедев аз нав Дабири кулли Иттиҳоди Давлатҳои Мустақил таъйин гардид
Аз рӯйи натиҷаҳои ҷаласаи Шурои сарони давлатҳои ИДМ нишасти матбуотӣ баргузор шуд
Имрӯз дар Тоҷикистон ҷаласаи Шурои сарони кишварҳои Иттиҳоди Давлатҳои Мустақил баргузор мегардад
Сарвазири Арманистон Никол Пашинян бо сафари корӣ ба Тоҷикистон ташриф овард