Вакилони Маҷлиси намояндагон дар кори комиссияҳои Ассамблеяи байнипарлумонии ИДМ иштирок намуданд

Октябрь 21, 2021 14:01

ДУШАНБЕ, 21.10.2021 /АМИТ «Ховар»/. Вакилони Маҷлиси намояндагон дар кори ҷаласаҳои нақшавии комиссияҳои доимии Ассамблеяи байнипарлумонии Иттиҳоди Давлатҳои Мустақил оид ба масоили сиёсӣ ва ҳамкории байналмилалӣ, мудофиа ва амният, иҷтимоию иқтисодӣ, ҳуқуқӣ, сиёсати хориҷӣ, ки 18-21 октябр дар қасри Таврическии шаҳри Санкт-Петербурги Федератсияи Русия   дар реҷаи фосилавӣ (онлайн) баргузор гардид, фаъолона ширкат варзиданд, иттилоъ дод котиби матбуоти Маҷлиси намояндагон Муҳаммадато Султонов ба АМИТ «Ховар».

Дар кори ҷаласаи мазкур, аз ҷумла раиси кумитаи Маҷлиси намояндагон оид ба тартиботи ҳуқуқӣ, мудофиа ва амният Рустам Шоҳмурод, раиси кумитаи Маҷлиси намояндагон оид ба масъалаҳои аграрӣ, захираҳои об ва замин  Рустам Латифзода, раиси кумитаи Маҷлиси намояндагон оид ба масъалаҳои иҷтимоӣ, оила ва ҳифзи саломатӣ  Сумангул Тағойзода,  раиси кумитаи Маҷлиси намояндагон оид ба сохтори давлатӣ ва худидоракунии маҳаллӣ Файзалӣ Идизода, раиси комиссияи экологии Маҷлиси намояндагон Муҳаммадраҳим  Юсуфӣ, вакилон Мавлудахон Мирзозода, Зайниддин Сафаров, Равшан Раҷабзода, Сарвиноз Маҷидова, Толибхон Азимзода, Фозил Обидзода ва Зоир Раҳмонзода иштирок карданд.

Дар рӯзномаи ҷаласа муҳокимаи лоиҳаҳои қонунҳои намунавӣ- «Дар бораи ғалла», «Дар бораи низоми ҳуқуқии ҳудудҳое, ки ба олудашавии радиоактивӣ дучор шудаанд», «Дар бораи бехатарии экологӣ» (нашри нав), «Дар бораи дастрасӣ ба иттилооти экологӣ» (нашри нав), «Дар бораи партовҳои истеҳсолӣ ва истеъмолӣ» (нашри нав), «Дар бораи минтақаҳои табиии махсус муҳофизатшаванда» (нашри нав), «Дар бораи фондҳои экологӣ», «Дар бораи занбӯрпарварӣ», «Дар бораи кишоварзии органикӣ» ва лоиҳаи консепсияи қонуни намунавӣ «Дар бораи арзёбии таъсири эҳтимолии фаъолияти истихроҷи маъдан ба саломатии аҳолии ҳамсояҳо» мавриди баррасӣ қарор гирифт.

Аъзои комиссия дар бораи натиҷаҳои Конгресси нуҳуми байналмилалии экологии Нева, оид ба таҳияи қонунгузории Ҷумҳурии Тоҷикистон дар соҳаи сиёсати аграрӣ, захираҳои табиӣ ва экология ва истифодаи санадҳои намунавии қонунгузорӣ, ки аз ҷониби кишвар қабул шудаанд, маълумоти мукаммалро шуниданд.

Вакилони Парлумон ҳамчунин маҷмӯи масъалаҳои марбут ба дастгирии молиявии фаъолияти Ассамблеяи Байнипарлумонии ИДМ -ро баррасӣ карданд. Ҳамзамон масъалаҳои марбут ба маблағгузории ҷории фаъолияти АБ  ИДМ, ташаккул ва иҷрои буҷети Ассамблеяи байнипарлумонӣ муҳокима шуданд.

Иштироккунандагони ҷаласа инчунин рафти омодасозии барномаи  нави Тавсияҳо барои нозирони байналмилалӣ аз ИДМ оид ба назорати интихобот ва раъйпурсиро баррасӣ карданд.

Дар  кори иҷлосияи ҳабдаҳуми Ассамблеяи Байнипарлумонии ҷавонони Иттиҳоди Давлатҳои Мустақил вакили Маҷлиси намояндагон  Зоир Раҳмонзода иштирок ва суханронӣ намуд. Чорабинӣ дар реҷаи фосилавӣ баргузор гардид ва дар кори ин иҷлосия  намояндагони парлумонҳои Озарбойҷон, Арманистон, Беларус, Қазоқистон, Молдова, Русия, Тоҷикистон ва Узбекистон ширкат намуданд. Иштирокдорони ҷаласа ҳисоботро дар бораи фаъолияти ташкилот дар соли 2020 шунида, ҳамоҳангсози нави Ассамблеяи Байнипарлумонии ҷавононро интихоб намуданд. Раёсати Ассамблеяи Байнипарлумонии ҷавонони Иттиҳоди Давлатҳои Мустақил аз Ҷумҳурии Узбекистон ба Ҷумҳурии Озарбойҷон гузаронида шуд. Вакилони парлумони ҷавони кишварҳои Иттиҳод ҳамчунин вазъи кунунӣ ва самтҳои асосии рушди туризми ҷавонон дар кишварҳои ИДМ-ро баррасӣ намуданд.

Иштирокчиёни кори ҷаласаҳои нақшавии комиссияҳои доимии Ассамблеяи байнипарлумонии ИДМ ҳамчунин таъкид намуданд, ки ҳамкории байнипарлумонии кишварҳои аъзои ИДМ дар шаклҳои гуногуни ҳамкории дуҷониба ва бисёрҷониба амалӣ карда мешаванд.

Дар кори ҷаласаҳои нақшавии комиссияҳои доимии Ассамблеяи байнипарлумонии ИДМ намояндаи Маҷлиси Олии Ҷумҳурии Тоҷикистон дар қароргоҳи Ассамблеяи Байнипарлумонии давлатҳои аъзои ИДМ дар шаҳри Санкт-Петербург Бахтовар Сафарзода иштирок намуд.

 АКС: МНМО ҶТ

Октябрь 21, 2021 14:01

Хабарҳои дигари ин бахш

Дар Маҷлиси намояндагон бахшида ба Рӯзи Ваҳдати миллӣ ҳамоиши идона доир гардид
Ҳайати Маҷлиси намояндагон дар Форуми 20-уми СММ оид ба идоракунии интернет иштирок дорад
Ваҳдати миллӣ арзишмандтарин бозёфт дар таърихи навини давлатдории миллати тоҷик мебошад
Барно Саидвализода: «Ваҳдати миллӣ – ин неъмати бузургу кафолати зиндагии шоистаро пойдор нигоҳ бидорем»
Ҷаласаи навбатии иҷлосияи якуми Маҷлиси намояндагони Маҷлиси Олии Ҷумҳурии Тоҷикистон, даъвати ҳафтум баргузор шуд
Дар Маҷлиси намояндагон масъалаи обу иқлим ва ҳифзи пиряхҳо баррасӣ шуд
Ваҳдати миллӣ ва рушди парламентаризм дар Тоҷикистон яке аз дастовардҳои муҳими даврони соҳибистиқлолӣ ба шумор меравад
ПЕШВОИ ВАҲДАТОФАР. Ва ё ваҳдате, ки бо шарофати он давлатдории миллии тоҷикон дубора эҳё гардид
Густариши робитаҳои байнипарлумонии Тоҷикистон ва Британияи Кабир баррасӣ гардид
Дар Лондон мулоқоти ҳайатҳои парламентии Тоҷикистон ва Британияи Кабир баргузор мешавад
Имрӯз ҷаласаи навбатии иҷлосияи якуми Маҷлиси намояндагони Маҷлиси Олӣ, даъвати ҳафтум баргузор шуд
Ҷаласаи навбатии иҷлосияи якуми Маҷлиси намояндагони Маҷлиси Олӣ, даъвати ҳафтум баргузор гардид