Дар Маҷлиси намояндагон масоили ҳамкории Тоҷикистон ва Беларус баррасӣ гардид

Ноябрь 18, 2021 13:04

ДУШАНБЕ, 18.11.2021 /АМИТ «Ховар»/. Баррасии масоили ҳамкории Тоҷикистон ва Беларус зимни  вохӯрии муовини якуми Раиси Маҷлиси намояндагони Маҷлиси Олии Ҷумҳурии Тоҷикистон Маҳмадалӣ Ватанзода ва Сафири Фавқулода ва Мухтори Ҷумҳурии Беларус дар Ҷумҳурии Тоҷикистон Виктор Денисенко мавриди баррасӣ қарор гирифт, хабар дод котиби матбуоти Маҷлиси намояндагон Муҳаммадато Султонов ба АМИТ “Ховар”.

Зикр гардид, ки мулоқоти имрӯза имкони баррасии ҳолат ва дурнамои ҳамкории кишварҳо дар ҳама ҷанбаҳо маҳсуб мешавад.

Рушди муносибатҳои дуҷонибаву бисёрҷониба миёни Тоҷикистон ва Беларус дар марҳалаи имрӯза дар сатҳи баланд арзёбӣ гардид. Муколамаи мунтазами сиёсӣ дар сатҳи олӣ ба роҳ монда шудааст, ки ба рушд ва тавсеаи муносибатҳои дуҷониба пайваста мусоидат мекунад.

Иброз гардид, ки мулоқоти Сарони ду давлат воқеан анъанавӣ гардида, дар доираи чорабиниҳои минтақавӣ ва созмонҳои байналмилалӣ мунтазам доир мегардад, ки зимини он дар маҷмӯъ масъалаҳои таҳким бахшидани амният ва истиқрор дар минтақаи Иттиҳоди Давлатҳои Мустақил муҳокима шуда, ба раванди ҳамгироӣ дар минтақа мусоидат менамоянд.

Маҳмадалӣ Ватанзода ҳамчунин таъкид намуд, ки Тоҷикистон ва Беларус пайравони мӯътақид ва собитқадами тавсеа ва таҳкими ҳамкории минтақавӣ буда, оид ба баланд бардоштани сатҳи ҳамкории самаранок дар доираи Созмони Милали Муттаҳид, Созмони Амнияту Ҳамкории Аврупо, Иттиҳоди Давлатҳои Мустақил, Созмони Аҳдномаи амнияти дастҷамъӣ ва дигар созмонҳои минтақавӣ, ки ҳарду кишвар аъзои онҳо мебошанд, мавқеи якхела доранд.

Вобаста ба аксари масъалаҳои муҳими байналмилалӣ назар ва мавқеи ҳарду кишвар ба ҳам наздик буда, Ҷумҳурии Тоҷикистон ва Ҷумҳурии Беларус оид ба масъалаҳои узвият дар сохтори байналмилалӣ ҳамдигарро ҷонибдорӣ менамоянд.

Ҷонибҳо зимни мулоқот, ки дар фазои дӯстӣ ҷараён гирифт, омодагии худро барои  тавсеаи ҳамкории тиҷоратию иқтисодӣ ва муносибатҳои фарҳангию гуманитарӣ байни мамлакатҳо изҳор доштанд.

Дар мулоқот ҳамзамон омодагӣ барои ба роҳ мондани робитаи зичу пурсамар байни минтақаҳои ду кишвар ва субектҳои хоҷагидори Тоҷикистону Беларус таъкид шуд. Зикр гардид, ки барои ноил шудан ба ҳадафҳои судманд истифодаи фаъоли сохтори Комиссияи байниҳукуматӣ оид ба ҳамкории тиҷоратию иқтисодӣ зарур аст.

Ҳамчунин дигар масъалаҳои муҳим бар нафъи мардумони кишварҳо дар соҳаҳои фарҳангию гуманитарӣ, маориф, тандурустӣ, сайёҳӣ, ҳамкории муассисаҳои олии таълими Тоҷикистон ва Белорус ва ғайра баррасӣ гардид.

Зимни баррасии масъалаҳои таъмини амнияти сартосарӣ ҷонибҳо масъалаҳои таҳкими ҳамгироӣ дар самти мубориза бо таҳдиду хатарҳои ҷаҳони муосирро низ муҳокима карданд.

Дар мулоқот аъзои гурӯҳи дӯстии Маҷлиси  намояндагон бо парлумони Ҷумҳурии Беларус Мавлудахон Мирзозода, Зоир Раҳмонзода, Неъматулло Холбойзода ва Ғайрат Азиззода иштирок намуданд.

АКС: МН МО ҶТ

Ноябрь 18, 2021 13:04

Хабарҳои дигари ин бахш

Файзалӣ Идизода дар Женева оид ба дастовардҳои парламенти Тоҷикистон сухан гуфт
Раиси Маҷлиси намояндагон дар иҷлосияи сатҳи баланд дар Женева иштирок намуд
Файзалӣ Идизода дар Конфронси ҷаҳонии Раисони парлумонҳо дар Женева иштирок менамояд
Раиси Маҷлиси намояндагони Маҷлиси Олии Ҷумҳурии Тоҷикистон бо Президенти Муғулистон мулоқот намуд
Дар Душанбе ҳамкории байнипарлумонии Тоҷикистону Муғулистон баррасӣ шуд
Робитаҳои байнипарлумонии Тоҷикистон ва Русия густариш меёбанд
Вакилони Маҷлиси намояндагони Тоҷикистон дар Чин ташкили механизми муошират байни мақомоти қонунгузорро меомӯзанд
Раиси Маҷлиси намояндагони Маҷлиси Олии Ҷумҳурии Тоҷикистон бо Президенти Ҷумҳурии Қирғизистон мулоқот намуд
Раиси Маҷлиси миллии Маҷлиси Олӣ Рустами Эмомалӣ бо Президенти Қирғизистон Садир Жапаров мулоқот намуданд
1 сол пеш дар Душанбе ду иншооти муҳташам- бинои Парлумон ва Ҳукумати Тоҷикистон ба истифода дода шуд
Мавсума Муинӣ бо истеъдодҳои наврасу ҷавон вохӯрӣ доир намуд
Дар Душанбе масъалаи рушду таҳкими ҳамкории байнипарламентӣ байни Тоҷикистон ва Беларус баррасӣ гардид