«Истиқлол» чемпиони даҳкаратаи Тоҷикистон гардид

ДУШАНБЕ, 22.11.2021 /АМИТ «Ховар»/. Дар доираи бозиҳои даври 25-уми Чемпионати Тоҷикистон оид ба футбол миёни дастаҳои Лигаи олӣ «Истиқлол» бар дастаи «Душанбе» бо ҳисоби 8:0 пирӯз ва пеш аз муҳлат чемпиони Тоҷикистон шуд, иттилоъ доданд аз Кумитаи миллии олимпии Тоҷикистон ба АМИТ «Ховар».

Ин маротибаи даҳум аст, ки дастаи “Истиқлол”-и Душанбе унвони чемпиониро мегирад. Қаблан клуби Душанбе медалҳои тиллои Чемпионати Тоҷикистонро солҳои 2010, 2011, 2014, 2015, 2016, 2017, 2018, 2019 ва 2020 ба даст оварда буд.

Пеш аз анҷоми чемпионат, ки ду давр мондааст, дастаи «Душанбе» аз ҳаққи иштирок дар бозиҳои мавсими ояндаи Лигаи олӣ маҳрум шуд. Дастаи дигаре, ки Лигаи олиро тарк мекунад, мумкин аст «Эсхата», «Файзканд» ё «Кӯктош» бошад.

Медалҳои нуқраи чемпионати мамлакат насиби дастаи «Хуҷанд» гардида, дастаҳои «Истаравшан» ва КМВА барои медалҳои биринҷӣ мубориза мебаранд. 23 ноябр ин ду даста дар Истаравшан бо ҳам вомехӯранд.

АКС: Кумитаи миллии олимпии Тоҷикистон