Тоҷикистон мавқеи ЮНЕСКО-ро дар ҳифзу нигоҳдории мероси таърихии Афғонистон дастгирӣ менамояд

Ноябрь 12, 2021 08:26

ДУШАНБЕ, 12.11.2021 /АМИТ «Ховар»/. 11 ноябр Вазири корҳои хориҷии Ҷумҳурии Тоҷикистон, Раиси Комиссияи миллии Ҷумҳурии Тоҷикистон оид ба корҳои ЮНЕСКО Сироҷиддин Муҳриддин дар мубоҳисаҳои умумии сиёсии ҷаласаи 41-уми Конфронси генералии ЮНЕСКО дар шаҳри Париж суханронӣ намуд. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Сироҷиддин Муҳриддин дар оғози суханронии хеш ба Мудири кулли ЮНЕСКО хонум Одрӣ Азуле барои дар сатҳи баланд баргузор гардидани Конфронси генералии навбатии созмон арзи сипос кард.

Роҳбари ҳайати Тоҷикистон таъкид кард, ки ҳамоиши мазкур барои омӯзиш, табодули таҷриба ва ҳамоҳангии талошу эҳтимоми муштараки ЮНЕСКО ва кишварҳои аъзои он ҷиҳати пешбурди ҳадафу вазифаҳои марбут ба ҳифзи арзишҳои миллӣ – фарҳангу забон, ёдгориҳои таърихӣ, фарҳангӣ ва табиӣ, расму оини аҷдодӣ, рушди илму маориф ҳамчун платформаи муфид хизмат хоҳад намуд.

Намояндаи кишвар ба мавзӯи мақому манзалати Тоҷикистон ҳамчун давлати соҳибихтиёр ва узви баробарҳуқуқи ҷомеаи ҷаҳонӣ, хусусан дастовардҳои сиёсати дохилӣ ва хориҷии он дар тӯли Истиқлолияти давлатии ҷумҳурӣ, фаъолияти густурдаи мамлакат дар чаҳорчӯби ЮНЕСКО тариқи татбиқи лоиҳаву барномаҳои миллӣ, минтақавӣ ва байналмилалӣ дар соҳаи фарҳанг, илм ва маориф, саҳми Тоҷикистон дар ҳифзу тарғиби  мероси ҷаҳонии фарҳангӣ ва табиӣ, ҳамкории ҳадафнок ба хотири таҳкими сулҳу субот ва рушди устувори тамоми давлатҳои дунё тавассути шарикии муассир дар доираи ваколати ЮНЕСКО тамаркуз кард.

Таъкид гардид, ки ЮНЕСКО ягона ташкилотест, ки дар даврони барои ҷомеаи ҷаҳонӣ душвору печида ба ваҳдату ҳамбастагӣ тариқи фарҳанг, илм ва маориф фаъолона даъват ва иқдомҳои амалӣ менамояд.

Сироҷиддин Муҳриддин шомил будани мавзеи табиии «Боғи миллии Тоҷикистон», шаҳраки қадимаи Саразм, мусиқии миллии «Шашмақом», Рӯзи байналмилалии Наврӯз, таоми миллии «Оши палав» ва либоси миллии «Чакан» ба Феҳристи мероси ҷаҳонии ЮНЕСКО зикр кард.

Ҳамзамон аз сатҳи баланди ҳамкории кишвар бо ЮНЕСКО дар пасманзари ҷашни 30-солагии Истиқлолияти давлатии Ҷумҳурии Тоҷикистон, хосатан дар иртибот ба баргузории чорабинии бошукӯҳи Рӯзи фарҳанги Тоҷикистон дар ЮНЕСКО (14 октябри соли 2021) бо иштироки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Мудири кулли ЮНЕСКО хонум Одрӣ Азуле, ҳамчунин Намоишгоҳи беназири нигораҳои таърихӣ таҳти унвони «Тоҷикистон – кишвари дарёҳои тиллоӣ» дар Осорхонаи миллии санъати осиёии “Гиме”-и шаҳри Париж (аз 13 октябри соли 2021 то 10 январи соли 2022) изҳори хушию қаноатмандӣ карда шуд.

Дар фарҷоми суханронӣ ҷониби Тоҷикистон дар мавриди нақши фаъоли кишвар дар ҷодаи пешбурди масъалаҳои об ва иқлим дар доираи низоми Созмони Милали Муттаҳид, аз ҷумла Барномаи байниҳукуматии гидрологии ЮНЕСКО, инчунин ҷиҳати дастгирии ташаббуси Тоҷикистон оид ба эълони соли 2025 Соли байналмилалии ҳифзи пиряхҳо, эъломи Рӯзи ҷаҳонии пиряхҳо ва аҳамияти мубрами таъсиси Хазинаи байналмилалии пиряхҳо изҳори ақида намуд.

Вазири корҳои хориҷӣ бо ишора ба вазъи кунунии нигаронкунанда дар Афғонистон пуштибонии Тоҷикистонро аз мавқеи ЮНЕСКО дар ҳифзу нигоҳдории мероси таърихӣ дар ин кишвар тазаккур дода, бори дигар муроҷиати Тоҷикистонро ба ҷомеаи ҷаҳонӣ, пеш аз ҳама, ба кишварҳои манфиатдор дар масъалаи ҳарчӣ зудтар расонидани кумакҳои башардӯстона ба мардуми азияткашидаи Афғонистон тариқи созмонҳои байналмилалӣ таъкид намуд.

АКС: ВКХ ҶТ

Ноябрь 12, 2021 08:26

Хабарҳои дигари ин бахш

Тоҷикистон ва СҲИ масъалаҳои ҳамкорӣ ва механизмҳои расонидани кумакҳои башариро ба мардуми афғон баррасӣ намуданд
Сафири Тоҷикистон бо Вазири хоҷагии оби Ҷумҳурии Узбекистон мулоқот намуд
Дар Душанбе вохӯрии гурӯҳҳои кории ҳайатҳои ҳукуматии Тоҷикистон ва Узбекистон баргузор гардид
HAPPY ANNIVERSARY! Тоҷикистон ва ИМА 30-солагии муносибатҳои дӯстона ва дипломатиро таҷлил менамоянд
Миёни вазоратҳои корҳои хориҷии Тоҷикистон ва Русия дар Москва машваратҳо доир шуданд
Дар Покистон китоби «Тоҷикон дар оинаи таърих» ба забони урду нашр ва муаррифӣ гардид
Дар Теҳрон ҳамкории дуҷонибаи Тоҷикистон ва Эрон баррасӣ гардид
Сафири Тоҷикистон дар Ӯзбекистон бо ҳайати кормандони рӯзномаи «Овози тоҷик» мулоқот намуд
Пешвои миллат Эмомалӣ Раҳмон: Тоҷикистон бо 180 давлати дунё муносибатҳои дипломатӣ барқарор кардааст
Нарендра Модӣ ба саммити ҷашнии СҲШ ва дигар чорабиниҳои байналмилалию минтақавӣ дар Тоҷикистон баҳои баланд дод
Ҳайати Тоҷикистон дар ҷаласаи Шӯрои вазирони корҳои хориҷии СҲИ дар Исломобод иштирок намуд
ФАЪОЛИЯТИ НАМОИШГОҲИ ТОҶИКИСТОН ДАР ФАРОНСА ИДОМА ДОРАД. Ҳар рӯз садҳо ҳазор нафар сокинони Аврупо бо таъриху фарҳанги мардуми тоҷик шинос мешаванд