Завқӣ Завқизода ва Валид Абдураҳмон Алрешайдон рушди ҳамкории дуҷонибаро баррасӣ намуданд

ДУШАНБЕ, 18.11.2021 /АМИТ «Ховар»/. 17 ноябр вохӯрии Вазири рушди иқтисод ва савдо Завқӣ Завқизода бо Сафири Фавқулода ва Мухтори Шоҳигарии Арабистони Саудӣ дар Тоҷикистон Валид Абдураҳмон Алрешайдон баргузор гардид, ки зимни он мусоҳибон рушди ҳамкории мутақобилан судманд миёни ҷонибҳоро баррасӣ намуданд, иттилоъ доданд аз вазорати мазкур ба АМИТ «Ховар».

З. Завқизода зикр намуд, ки рушди ҳамкории мутақобилан судманд бо Шоҳигарии Арабистони Саудӣ барои Ҷумҳурии Тоҷикистон афзалияти аввалиндараҷа дошта, бо шарофати сиёсати оқилона ва дурандешонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва подшоҳи Шоҳигарии Арабистони Саудӣ муҳтарам Салмон ибни Абдул-Азиз ибни Абдураҳмон оли Сауд муносибатҳои ду кишвар ба сатҳи сифатан нав баромаданд.

Дар вохӯрӣ тарафҳо масъалаҳои муҳими ҷойдоштаи низоми тиҷорат ва иқтисоди ҳар ду кишвар, аз ҷумла бамаротиб зиёд кардани гардиши савдо миёни Ҷумҳурии Тоҷикистон ва Шоҳигарии Арабистони Саудӣ, таъсиси корхонаҳои муштарак дар минтақаҳои озоди иқтисодӣ, рушди ҳамкории дуҷониба дар самти иқтисоди сабз, таъсиси марказҳои логистикӣ ва дигар масъалаҳои муҳими ҳамкории тиҷоративу иқтисодӣ ва сармоягузориро муҳокима карданд.

Дар анҷоми вохӯрӣ тарафҳо омодагии худро ҷиҳати ба роҳ мондани ҳамкории мутақобилан судманд ва татбиқи масъалаҳои зикршуда баён намуданд.

АКС аз Вазорати рушди иқтисод ва савдо