ВИЖАГИҲОИ НИЗОМИ СИЁСӢ ДАР АФҒОНИСТОНИ МУОСИР. Имрӯз дар Душанбе таҳти ин унвон ҳамоиш доир шуд

ДУШАНБЕ, 15.12.2021. /АМИТ «Ховар»/. Афғонистон ба ҳайси кишвари мустақил бинобар ба қудрат расидани тоифаи зертобеъ аз қудратҳои ҷаҳонӣ мавсум ба толибон айни замон дар ҳоли ғайримушаххас ва номуайяни сиёсӣ қарор дорад. Коршиносони вижа тамоили маҳрум будани толибонро аз қобилияти идора кардани давлат мутазаккир шуда, муътақиданд, ки онҳо рӯзе қудратро канор хоҳанд гузошт. Ин нукта имрӯз зимни ҳамоиш  ҷиҳати баррасии авзоъ дар Афғонистон ва рӯнамои китоби доктори илмҳои таърих, профессор  Қосимшо Искандаров таҳти унвони «Афғонистон дар давраи ҳукумати ваҳдати миллӣ. Равандҳои сиёсӣ ва масоили амниятӣ» («Афганистан в  период правительства национального единства. Политические процессы и проблемы безопасности»), ки дар Академияи миллии илмҳои Тоҷикистон доир шуд, зикр гардид. 

Дар ҳамоиш Қосимшо Искандаров, ки аз зумраи коршиносони ватанист, ки бо авзои сиёсии Афғонистон  хуб ошноӣ дорад, гуфт, ки то он даме  толибон сари  қудратанд, ояндаи дурахшони  ҳамсоякишвари мо — Афғонистонро намебинад.

Ёдовар мешавем, чанде қабл дар суҳбат бо Директори АМИТ «Ховар» Саидалӣ Сиддиқ профессор  Қосимшо Искандаров тазаккур дода буд, ки ба сари қудрат омадани   толибон дар Афғонистон хатари терроризми глобалиро ба рӯзномаи ҷаҳонӣ баргардонд.

Мавсуф зикр намуда буд, ки тамоми асосҳо вуҷуд доранд ба он бовар кунем, ки ин кишвар ҳамчун яке аз гармтарин нуқтаҳои сайёра ба бетартибиҳои боз ҳам бештар дучор хоҳад шуд ва он метавонад дубора ба маркази таълими террористон, қочоқи маводи мухаддир ва силоҳ табдил ёбад.

Дар ҳамоиши мазкур дар атрофи пажӯҳиши густурдаи Қосимшо Искандаров иштирокдорон изҳори назар карданд.