Ба ғолиби олимпиадаи байналмилалӣ Алиҷон Усмонов 12 000 сомонӣ мукофотпулии Вазири маориф ва илм супорида шуд

Январь 27, 2022 14:19

ДУШАНБЕ, 27.01.2022 /АМИТ «Ховар»/. Дар озмоишгоҳи иноватсионии МДТ «Литсей барои хонандагони болаёқат» дар шаҳри Хуҷанд маросими қадршиносии ғолибони олимпиадаҳои байналмилалии фаннӣ баргузор гардид, ки дар он барои ғолибият дар 4 озмуни сатҳи ҷаҳонӣ ва гузоштани рекорди олимпиадаи «Дониш»-и шаҳри Анталияи кишвари Туркия (аз 100 холи имконпазир ба даст овардани 100 хол) ба хонандаи синфи 10 -и Литсейи мазкур Алиҷон Усмонов диплом, Ҷом ва туҳфаи Вазири маориф ва илми Ҷумҳурии Тоҷикистон Муҳаммадюсуф Имомзода дар ҳаҷми 12 ҳазор сомонӣ ҳадя карда шуд, хабар дод корманди Хадамоти матбуоти Раиси вилояти Суғд Андар Раҳмонӣ ба АМИТ «Ховар».

Инчунин барои иштирок ва ғолибият дар 3 озмуни сатҳи ҷаҳонӣ, гирандаи стипендияи Президенти Ҷумҳурии Тоҷикистон, хонандаи синфи 10 Фирӯза Абдуллоева бо 9000 сомонӣ, ғолиби озмуни байналмилалӣ дар Амрико ва Фаронса хонандаи синфи 9 — и Литсей Амир Абдуллозода бо 6000 сомонӣ, хонандаи синфи 11, ғолиби олимпиадаи байналмилалӣ аз фанни физика ва астрономия дар кишвари Амрико Меҳрангез Абдуллоева бо 5500 сомонӣ, ғолиби олимпиада аз фанни математика дар кишвари Таиланд Ясмина Аҳророва, хонандаи синфи 9 бо 5500 сомонӣ, ғолиби олимпиада аз фанни математика ва забони англисӣ дар кишвари Таиланд, хонандаи синфи 9 Фарина Маъсумова бо 5000 сомонӣ қадршиносӣ гардиданд.

Ҳамчунин дар идомаи маросим аз ҷониби маъмурияти Литсей ба ғолибони олимпиадаҳои байналмиллалии фаннӣ, аз ҷумла хонандаи синфи 9 Сафархон Ҳасанов, хонандаи синфи 10 Аҳмад Маъруфов, хонандаи синфи 9 Имдод Каҳҳоров, хонандаи синфи 9 Амир Султонов, хонандаи синфи 10 Абубакр Комилов, хонандаи синфи 7 Шукрулло Нарзуллоев ва хонандаи синфи 10 Аслан Насратшоев Ифтихорнома, медал ва ҷоиза дар ҳаҷми аз 900 то 500 сомонӣ супорида шуд.

Директори муассиса Сурайё Негматова аз дастовардҳои хонандагони Литсей дар 5 моҳи соли хониши 2021-2022 ёдовар шуда, зикр намуд, ки дар асоси дастуру ҳидоятҳои Пешвои миллат ва дастгириву ғамхориҳои пайвастаи Вазорати маориф ва илми Ҷумҳурии Тоҷикистон хонандагони Литсей тавонистанд дар муддати кӯтоҳ дар 8 озмуни сатҳи ҷаҳонӣ дар кишварҳои Амрико, Туркия, Таиланд, Чин, Федератсияи Русия, Бразилия, Англия ва Фаронса иштирок намуда, 173 медал ба даст оваранд.

Ба даст овардани гранти омӯзишӣ дар ҳаҷми 220 ҳазор доллари амрикоӣ ҷиҳати таҳсил дар донишгоҳи бонуфузи Донишгоҳи Амрикои Шимолӣ дар Штатҳои Муттаҳидаи Амрико аз ҷониби хонандагони Литсей, ғолибият ва ба даст овардани Ҷом аз фанни физика дар олимпиадаи 2-юми фанҳои дақиқ ва табиатшиносӣ таҳти унвони Коперникус дар шаҳри Техаси кишвари Амрико, ба даст овардани 2 Ҷом аз фанни забони англисӣ ва география дар олимпиадаи «Дониш»- шаҳри Анталияи кишвари Туркия, ки ин озмунҳо тариқи иштироки бевоситаи хонандагони Литсей сурат гирифт, аз дастовардҳои назаррас мебошанд.

Ҳамчунин зикр карда шуд, ки дар доираи «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф», солҳои 2020 -2040 бунёди синфхонаи инноватсионӣ ва фароҳам овардани шароити зарурӣ, аз ҷумла харидории комютер ва васли интернети босуръат ба онҳо ҷиҳати иштироки хонандагон дар олимпиадаҳои фосилавӣ барои пешрафти кор мусоидат намуд.

Дар Паёми навбатӣ ба Маҷлиси Олӣ Пешвои миллат бобати омӯзиши забонҳои русӣ ва англисӣ таъкид намуда, дастурҳои зарурӣ доданд ва маъмурияти Литсей низ баҳри иҷрои дастуру ҳидоятҳои Пешвои муаззами миллат дар муассиса маҳфилҳои доимоамалкунандаи омӯзиши забони англисӣ, чинӣ, русӣ, олмонӣ ва фаронсавиро тариқи ройгон ба роҳ мондааст, ки ҳамарӯза хонандагон баъди дарси асосӣ ба омӯхтани ин забонҳо машғуланд.

Дар хатми ҷаласа аз ҷониби роҳбарият ба гурӯҳи олимпичиёни Литсей ҷиҳати омодагии ҷиддӣ ба 7 олимпиадаи дигар, ки рӯзҳои наздик дар кишварҳои Англия, Фаронса, Олмон, Мексика, Италия, Русия ва Ҳиндустон баргузор мегарданд, машваратҳо дода шуданд.