Рустами Эмомалӣ: Сатҳ ва сифати фаъолияти ширкатҳои мобилӣ беҳбудӣ тақозо менамояд

ДУШАНБЕ, 13.01.2022. /АМИТ «Ховар»/. Раиси шаҳри Душанбе муҳтарам Рустами Эмомалӣ 12 январ зимни ҷаласаи ҷамъбастии мақомоти иҷроияи ҳокимияти давлатии шаҳри Душанбе дар баробари таҳлилу баррасии дигар соҳаҳо ба соҳаи алоқаи мобилӣ низ таваҷҷуҳи махсус зоҳир карда, сатҳи хизматрасонии онҳоро аз ҳар ҷиҳат такмилталаб арзёбӣ намуданд. Дар ин бора аз шуъбаи иттилоотии дастгоҳи Раиси шаҳри Душанбе хабар доданд.

Зикр гардид, ки дар бисёр ҳолатҳо он имконоте, ки ширкатҳо дар рӯнамоиҳои хизматрасониҳояшон инъикос менамоянд, ба воқеият ҷавобгӯ нест.

Инчунин аз пешравиҳои соҳаи алоқа дида, сифати алоқа ва суръати интернет бениҳоят суст буда, таҷҳизот ва дастгоҳҳои соҳа зарурат ба таҷдиду навсозӣ доранд.

Бинобар ин, ба роҳбарони ширкатҳои мобилӣ дастуру супоришҳои қатъӣ дода шуд, ки дар кӯтоҳтарин муддат ҷиҳати воридоти таҷҳизоти замонавӣ, баланд бардоштани сифатнокии хизматрасонии алоқаю интернет ва бартараф намудани дигар камбудиҳои ҷойдошта тадбирҳои таъхирнопазир андешанд.

АКС аз АМИТ «Ховар»