Сафири Қирғизистон дар Тоҷикистон аз вазифа барканор гардид

ДУШАНБЕ, 03.02.2022 /АМИТ «Ховар»/. Садир Жапаров сафири Қирғизистон дар Тоҷикистон Ҷаниш Рустенбековро аз вазифа озод намуд. Тавре АМИТ «Ховар» иттилоъ медиҳад, дар ин бора дирӯз, 2 феврал хадамоти матбуоти Президенти Қирғизистон хабар додааст.

«Президенти Ҷумҳурии Қирғизистон Садир Жапаров фармон ба имзо расонид, ки тибқи он Рустенбеков Ҷаниш Султонқулович аз вазифаи Сафири Фавқулода ва Мухтори Ҷумҳурии Қирғизистон дар Ҷумҳурии Тоҷикистон озод карда шуд», — омадааст дар хабар.

Ҷ.Рустенбеков (ДАР АКС) аз декабри соли 2018 сафири Қирғизистон дар Душанбе буд. Қабл аз ин, ӯ намояндагиҳои дипломатии Қирғизистонро дар Туркманистон (2014 — декабри 2018) ва Қазоқистон (декабри 2007 — сентябри 2011) раҳбарӣ мекард. Қабл аз ин вай вазири ҳолатҳои фавқулода, губернатори вилояти Ӯш ва котиби давлатии назди президенти ин ҷумҳурӣ буд.

Тавре расонаҳои Қирғизистон қаблан хабар дода буданд, 30 октябри соли 2018 ҳангоми баррасии номзадии ӯ ба мақоми сафир дар Ҷумҳурии Тоҷикистон дар Жогорку Кенеш вакилон ба Рустембеков тавсия додаанд, ки ба масъалаҳои марз бо Тоҷикистон таваҷҷуҳи бештар зоҳир кунад. Дар навбати худ номзад ҷавоб дод, ки барои ҳалли ин масъалаҳо тамоми имконотро истифода мебарад.

                                                   АКС аз манбаъҳои боз