Тоҷикистон дар ҷаласаи Шӯрои амнияти СММ нақши СААД-ро дар мубориза бо таҳдиду чолишҳои муосир муҳим арзёбӣ кард
ДУШАНБЕ, 17.02.2022 /АМИТ «Ховар»/. Намояндаи доимии Ҷумҳурии Тоҷикистон дар СММ Ҷонибек Ҳикмат дар ҷаласаи Шӯрои амнияти СММ дар мавзӯи «Ҳамкории СММ ва созмонҳои минтақавӣ ва зерминтақавӣ дар дастгирии сулҳу амнияти байналмилалӣ: ҳамкории Созмони Милали Муттаҳид ва Созмони Аҳдномаи амнияти дастҷамъӣ» иштирок ва суханронӣ намуд. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.
Зимни суханронӣ Ҷонибек Ҳикмат аз афзоиши терроризми байналмилалӣ, ифротгароӣ, гардиши ғайриқонунии маводи мухаддир ва шаклҳои гуногуни ҷиноятҳои муташаккили фаромиллӣ аз Афғонистон зуҳуркунанда изҳори нигаронӣ намуда, нақши созмонҳои минтақавӣ, аз ҷумла СААД-ро ҷиҳати таҳкими талошҳои СММ дар мубориза бо таҳдиду чолишҳои муосир муҳим арзёбӣ кард.
«Таҳдидҳои эҳтимолии амниятӣ зарурати ба сатҳи сифатан нав баровардани ҳамкории СММ ва СААД-ро тақозо мекунанд. Дар ин замина таҳияи абзорҳои ҳамкории СААД ва СММ дар мубориза бо кочоқи маводи мухаддир низ муҳим мебошад», — зикр намуд Намояндаи доимии Ҷумҳурии Тоҷикистон дар СММ.
Дар робита ба таҳкими сарҳади Тоҷикистон ва Афғонистон Намояндаи доимӣ аз ташаббуси Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба бунёди «камарбанди амниятӣ» дар атрофи Афғонистон ёдовар шуда, барои татбиқи он ҷалб кардани СММ ва дигар созмонҳои байналмилалиро мувофиқи мақсад донист.
Тавре қаблан АМИТ «Ховар» хабар дода буд, 25 январ Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар аввалин Нишасти сарони кишварҳои Осиёи Марказӣ-Чин, ки дар шакли маҷозӣ баргузор гардид, иштирок ва суханронӣ карда, зикр намуданд, ки «Тоҷикистон ҳамеша ҷонибдори истиқрори сулҳу субот дар Афғонистон аст. Даъвати Созмони Милали Муттаҳидро ҷиҳати расонидани кумакҳои башарӣ ба мардуми Афғонистон ҷонибдорӣ менамоем ва то ҳадди имкон ба мардуми Афғонистон кумакҳои башарӣ мерасонем».
Сарвари Тоҷикистон афзуданд, ки фаъол шудани гурӯҳҳои террористиву ифротӣ дар қаламрави кишвари ҳамсоя нигаронкунанда мебошад.
«Дар ин замина мо барои таҳкими ҳифзи сарҳад бо Афғонистон тадбирҳои иловагӣ меандешем. Мо ҷонибдори таҳкими минбаъдаи ҳамкорӣ миёни мақомоти дахлдорамон ҳастем»,-иброз доштанд Эмомалӣ Раҳмон.
Қаблан Президенти Ҷумҳурии Тоҷикистон хостори таъсиси «камарбанди амниятӣ» дар атрофи Афғонистон шуда буданд, зеро дар ин кишвар амалиёти ҷангҷӯёни ДОИШ* шиддат мегирад.
АКСҲО: ВКХ ҶТ
Дар Москва қатъномаи СММ оид ба «Даҳсолаи байналмилалии таҳкими сулҳ ба хотири наслҳои оянда» муаррифӣ шуд
Дар Масқат масъалаи рушди ҳамкории Тоҷикистону Умон дар соҳаи тандурустӣ баррасӣ шуд
Рушди муносибатҳои дуҷонибаи Тоҷикистон ва Кувайт баррасӣ шуд
Идибек Қаландар дар Муколамаи сатҳи баланди сиёсӣ ва амниятии Иттиҳоди Аврупо ва Осиёи Марказӣ иштирок намуд
Сафири Тоҷикистон дар Давлати Кувайт бо Дабири кулли Муколамаи ҳамкории Осиё мулоқот намуд
Мероси Мир Сайид Алии Ҳамадонӣ дар нишасти байналмилалӣ дар Теҳрон баррасӣ гардид
Мусоҳибаи Сафири Ҷумҳурии Тоҷикистон дар Салтанати Умон Зубайдулло Зубайдзода бо рӯзномаи «Умон»
Идибек Қаландар бо муовини Дабири кулли Хадамоти амалиёти хориҷии Аврупо мулоқот намуд
Дар Теҳрон масоили рушди ҳамкории Тоҷикистон ва Эрон дар соҳаи нақлиёт баррасӣ гардид
Қоҳир Расулзода ҳамдардии амиқи Ҳукумат ва мардуми Тоҷикистонро ба давлат ва мардуми Давлати Қатар иброз намуд
Таҳкими ҳамкорӣ байни сохторҳои дахлдори иқтисодии Тоҷикистон ва Умон баррасӣ шуд
Дар Ню-Йорк натиҷаҳои Конфронси чоруми байналмилалии сатҳи баланд оид ба об дар Душанбе муаррифӣ шуданд
