Доир ба ҳамкории иқтисодию сармоягузории хориҷӣ нишасти корӣ баргузор гардид

ДУШАНБЕ, 07.05.2022 /АМИТ «Ховар»/. 5 май таҳти роҳбарии муовини Вазири корҳои хориҷии Ҷумҳурии Тоҷикистон Шараф Шерализода бо иштироки ҳузуриву маҷозии роҳбарияти мақомоти иҷроияи ҳокимияти давлатии ВМКБ, вилоятҳои Хатлон, Суғд, шаҳри Душанбе, инчунин шаҳру ноҳияҳои тобеи ҷумҳурӣ, роҳбарони намояндагиҳои дипломатӣ ва муассисаҳои консулии Ҷумҳурии Тоҷикистон дар хориҷа нишасти корӣ баргузор гардид. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Дар нишасти корӣ раванди иҷрои дастуру нақшаҳои кории ҳукуматӣ роҷеъ ба густариши ҳамкории иқтисодии хориҷӣ, ҷалби сармояи хориҷӣ бо кишварҳои мавриди масъулияти намояндагиҳои дипломатӣ ва муассисаҳои консулии Ҷумҳурии Тоҷикистон дар соҳаҳои авлавиятноки тиҷоратию сармоягузорӣ баррасӣ гардида, дар ин зимн зарурати таҳкими абзорҳои татбиқи вазифаҳои муштарак миёни мақомоти соҳавии кишвар ва намояндагиҳои дипломатии Тоҷикистон бо мақсади рушди баъдии робитаҳои иқтисодии хориҷӣ таъкид гардид.

Ҷонибҳо ҳамчунин доир ба дигар масъалаҳои марбут ба имконияти тавсеаи муносибатҳои дуҷонибаи Тоҷикистон бо кишварҳои мавриди таваҷҷуҳ табодули андеша намуданд.

Акс: ВКХ ҶТ