Дар Душанбе бахшида ба Рӯзи Ваҳдати миллӣ ҳамоиши маърифатӣ баргузор гардид

Июнь 14, 2022 10:22

ДУШАНБЕ, 14.06.2022 /АМИТ «Ховар»/. 13 июн дар Муассисаи таҳсилоти миёнаи умумии назди Сарраёсати маорифи шаҳри Душанбе бо ибтикор ва иқдоми бевоситаи Раиси Маҷлиси Миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ аз ҷониби мақомоти иҷроияи ҳокимияти давлатии шаҳри Душанбе ҳамоиши маърифатӣ доир ба тарғиби дастовардҳои Истиқлоли давлатӣ, ҳифзи суботу амният, арзишҳо ва манфиатҳои миллӣ бахшида ба Рӯзи Ваҳдати миллӣ баргузор гардид. Дар ин бора АМИТ «Ховар» бо истинод ба Сарраёсати маорифи шаҳри Душанбе хабар медиҳад.

Дар ҳамоиши мазкур муовини Раиси шаҳри Душанбе Дилбар Одилзода, вакили Маҷлиси намояндагони Маҷлиси Олии Ҷумҳурии Тоҷикистон Гавҳар Шарофзода, сардори Сарраёсати маорифи шаҳри Душанбе Баҳром Исмоилзода, Шоири халқии Тоҷикистон Муҳаммад Ғоиб, мудири шуъбаи дин, танзими анъана ва ҷашну маросимҳои Мақомоти иҷроияи ҳокимияти давлатии шаҳри Душанбе Абдуалим Норасов, кормандони дастгоҳи марказии Сарраёсати маориф, мудирони шуъбаҳои маорифи ноҳияҳои пойтахт, роҳбарони сохторҳои тобеи Сарраёсат ва роҳбарони муассисаҳои таълимии томактабӣ ва миёнаи умумии новобаста аз шакли ташкилию ҳуқуқӣ иштирок намуданд.

Зикр гардид, ки бо такя ба сабақҳои таърих ва хиради мардуми фарҳангсолори тоҷик, талошҳои пайвастаи Пешвои миллат муҳтарам Эмомалӣ Раҳмон ба халқи тоҷик муяссар шуд, ки дар муддати кӯтоҳ пеши роҳи низои даҳшатноки дохилиро гирад, барои интихоби низоми давлатдории муосир ва рушди мамлакат заминаи мусоид фароҳам оварад.

Мардуми соҳибмаърифату сулҳҷӯи мо таҳти парчами ваҳдату ягонагии миллат ба ҳам омада, ваҳдати миллиро ҳамчун шарти асосии пешрафти ҷомеа пазируфтанд ва барои ҳифзу таҳкими ин арзиши гаронбаҳо то ба имрӯз бо камоли ғайрату матонат азму талош варзида истодаанд. Ин дастоварди нодир ҳоло ба ҳайси ҷузъи таркибии суннати таҳаммулгароӣ дар пешрафти ҳаёти сиёсӣ, иқтисодию иҷтимоӣ ва фарҳангии кишварамон нақши бузург дошта, иттифоқ ва ҳамдилии халқи тоҷик мавриди омӯзиши Созмони Милали Муттаҳид ва бисёр ташкилотҳои олам гаштааст.

Бешак, рушду нумӯи Тоҷикистон дар даврони баъди баргузории Иҷлосияи XVI Шӯрои Олии Ҷумҳурии Тоҷикистон то ба имрӯз бо номи Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон алоқамандии ногусастанӣ дошта, бо тадбир ва талошҳои пайгиронаи Пешвои миллат давлатдории миллати тоҷик аз вартаи нобудӣ наҷот ёфт.

Дар ҷараёни  ҳамоиш тазаккур дода шуд, ки кормандони соҳаи маорифи пойтахт дар баробари дигар қишрҳои ҷомеаи кишвар дар рушду таҳкими истиқлолу ваҳдат ва дигар арзишҳои муқаддаси миллиамон сидқан саҳм мегузоранд.

Сулҳу субот ва ваҳдати миллии давлати озоду соҳибихтиёр имкон медиҳад, дар шароити пуртазод бо дар назардошти таҳдиду хатарҳои замони нав, бархӯрди тамаддунҳо, ваҳдати миллӣ ва Истиқлоли давлатӣ, ки асоси оромиву осудагии халқ, кафолати инкишофи давлат ва рушди ҳамаҷонибаи ҷомеа мебошанд, минбаъд таъмин карда шавад.

АКС: Сарраёсати маорифи шаҳри Душанбе

Июнь 14, 2022 10:22

Хабарҳои дигари ин бахш

МАРҲАБО БА ПОЙТАХТИ МО! Душанбе моҳи июн ба феҳристи машҳуртарин маконҳо барои москвагиҳо шомил шуд
ҲАДИСИ МУСАВВАР. Имрӯз дар Душанбе Намоишгоҳи байналмилалии универсалии «Тоҷикистон-2022» ба кори худ шурӯъ намуд
24 июн дар Душанбе дуюмин Фестивали дӯстӣ таҳти унвони «Ҷавонон – дар масири Истиқлолият ва давлатдории миллӣ» баргузор мешавад
Дар Душанбе Фестивали II байналмилалии эҷодиёти бадеии кӯдакон ва наврасон «Шукуфаҳои пойтахт» ҷараён дорад
ДИҚҚАТ! Пагоҳ дар Душанбе Намоишгоҳи байналмилалии универсалии «Тоҷикистон-2022» оғоз мегардад
Раиси шаҳри Душанбе Рустами Эмомалӣ бо Сафири Чин дар Тоҷикистон Тсзи Шумин мулоқот намуданд
Дар Душанбе Фестивали II байналмилалии эҷодиёти кӯдакону наврасон «Шукуфаҳои пойтахт» баргузор мешавад
Дар басти якум 2588 нафар кӯдакону наврасони Душанбе ба истироҳат фаро гирифта мешаванд
Раиси шаҳри Душанбе Рустами Эмомалӣ ноиби Президенти Бонки аврупоии таҷдид ва рушд Марк Боуманро ба ҳузур пазируфтанд
Раиси шаҳри Душанбе Рустами Эмомалӣ бо Сафири Ҷопон дар Тоҷикистон Тосихиро Аики мулоқот анҷом доданд
Раиси шаҳри Душанбе Рустами Эмомалӣ ду кӯдакистон ва як фурӯшгоҳро ифтитоҳ намуданд
«КӮДАКОН-ДУНЁИ МОЯНД». Имрӯз дар Душанбе Рӯзи байналмилалии ҳифзи кӯдакон таҷлил мегардад