Пагоҳ дар Гурҷистон Мусобиқаи ҷаҳонии «Tbilisi Grand Slam- 2022» оид ба намуди гӯштини дзюдо оғоз мегардад

Июнь 2, 2022 13:30

ДУШАНБЕ, 02.06.2022 /АМИТ «Ховар»/. Пагоҳ  дар  шаҳри Тбилиси-  пойтахти Гурҷистон Мусобиқаи ҷаҳонӣ оид ба намуди гӯштини дзюдо  «Tbilisi Grand Slam- 2022»  оғоз мегардад, ки то 5  июн идома меёбад. Дар ин мусобиқаи фароқоравӣ аз рӯи 7 вазн  285 варзишгар  аз 38 кишвари ҷаҳон иштирок мекунанд, хабар медиҳад шореҳи варзиши АМИТ «Ховар» Меҳрони Қурбон  бо истинод ба Федератсияи дзюдои Тоҷикистон.

Дар мусобиқаи «Tbilisi Grand Slam 2022» Тоҷикистонро дар сабқати мардон Нуралӣ Эмомалӣ, Шаҳбоз Саидаброров (ҳарду дар вазни то 66 кг), Маҳмадшариф Наҷмуддинов, Муҳаммадраҳим Сарахонов (ҳарду дар вазни то 73 кг), Шодмон Ризоев, Муҳаммадҷон Абдуҷалилов (ҳарду дар вазни то 81 кг), Кароматулло Ҳакимов (дар вазни то 90 кг), Мансур Раҳмон ва Абубакри Акобир (ҳарду дар вазни то 100 кг) намояндагӣ менамоянд.

Дар рӯзи аввали мусобиқа- 3 июн қувваозмоиҳо дар вазнҳои -60 кг, -66 кг миёни мардон ва -48 кг, -52 кг, -57 кг миёни занон баргузор мешаванд. Дар рӯзи дуюм – 4 июн гӯштингирони вазнҳои -73 кг, -81 кг миёни мардон ва -63 кг, -70 кг миёни занон рақобат хоҳанд кард.

Мусобиқа 5 июн бо қувваозмоиҳо дар вазнҳои -90 кг, -100 кг, +100 кг миёни мардон ва -78 кг ва +78 кг миёни занон ба поён мерасад. Варзишгарон дар ин мусобиқаи байналмилалӣ ба ҷуз аз медал соҳиби имтиёзҳо мешаванд. Инчунин ба беҳтаринҳо ҷоизаҳои молӣ тақдим мегарданд. Барои ҷои аввал 5000 евро, ҷои дуюм — 3000 ва ҷои сеюм 1500 евро пешбинӣ шудааст.

Ёдовар мешавем, ки соли гузашта дар мусобиқаи «Tbilisi Grand Slam 2021» ду паҳлавони шинохтаи тоҷик – Шаҳбоз Саидаброров ва Комроншоҳи Устопириён ширкат доштанд. Шаҳбоз медали биринҷӣ ба даст овард, вале Комроншоҳ ноком шуд. Ин мусобиқаи панҷум аз сайри ҷаҳонии дзюдо  дар  соли  2022 мебошад, ки доир мегардад.

Мавриди зикр аст, ки варзишгарони тоҷик дар чор мусобиқаи гузашта 3 медал ба даст оварданд. Комроншоҳ Устопириён дар «Гран Прии Португалия»   (28-30 январ) дар вазни -90кг, Темур Раҳимов дар «Гранд Слами Тел Авив» (17-19 феврал) ва «Гранд Слами Анталия»  (1-3 апрел) сазовори медали биринҷӣ шуда буданд.

Муҳлати системаи интихобии олимпии Париж-2024 дар намуди гӯштини дзюдо 26 июн оғоз мегардад. Аллакай варзишгарон дар мусобиқаи оянда – Гранд Слами Уланбатор (24-26 июн) ба ҷамъоварии холҳои олимпӣ шурӯъ мекунанд.

                                                                                                                    АКС аз манбаъҳои боз

Июнь 2, 2022 13:30

Хабарҳои дигари ин бахш

Ноибони Президенти ФФТ бо ҳолати омодагии варзишгоҳҳои шаҳри Ҳисор ба мусобиқаҳои байналмилалӣ шинос шуданд
Соли 2025 варзишгарони Тоҷикистон дар мусобиқаҳои байналмилалӣ 238 медал ба даст оварданд
НИШАСТИ МАТБУОТӢ. Донишҷӯёни Донишкадаи тарбияи ҷисмонӣ дар мусобиқаҳои байналмилалӣ соҳиби 26 медал шуданд
Таеквондочиёни тоҷик дар Чемпионати Осиё дар Малайзия ду медали биринҷӣ ба даст оварданд
Паҳлавонони тоҷик «Ulaanbaatar Grand Slam-2025»-ро бо як медали нуқра ҷамбаст намуданд
Марҳилаи якуми даврҳои омӯзишӣ оид ба барномаи литсензияи «B» идома дорад
Имрӯз мусобиқаи байналмилалии «Ulaanbaatar Grand Slam-2025» оид ба гӯштини ҷудо оғоз меёбад
Дар Чемпионати ҷаҳон оид ба варзиши намудҳои обӣ 2 варзишгари Тоҷикистон иштирок менамоянд
Бозии интихобии Ҷоми Осиё-2027 байни Тоҷикистон ва Малдив дар Хуҷанд баргузор мешавад
Тоҷикистон бозиҳои марҳилаи интихобии Ҷоми Осиё-2026 байни духтарони то 17-соларо мизбонӣ менамояд
Пагоҳ дар Душанбе маросими қуръакашии Ҷоми Тоҷикистон-2025 баргузор мегардад
Намояндаи Конфедератсияи футболи Осиё варзишгоҳи Турсунзодаро тафтиш намуд