БА ИСТИҚБОЛИ 31-СОЛАГИИ ИСТИҚЛОЛИЯТИ ДАВЛАТӢ. Дар ноҳияи Деваштич кӯдакистони замонавӣ бунёд гардид

ДУШАНБЕ, 28.08.2022 /АМИТ «Ховар»/. Ба истиқболи 31-солагии Истиқлолияти давлатии Ҷумҳурии Тоҷикистон дар деҳаи Нурободи ноҳияи Деваштич бо иқдоми соҳибкори маҳаллӣ кӯдакистон бунёд гардид, ки дар он 100 нафар хурдсолон ба таълиму тарбия фаро гирифта мешаванд. Дар ин бора ба АМИТ «Ховар» дар Хадамоти матбуоти Раиси вилояти Суғд хабар доданд.

Зимни боздиди Раиси вилояти Суғд Раҷаббой Аҳмадзода аз кӯдакистон иттилоъ дода шуд, ки он дар доираи корҳои ободонию созандагӣ ба истиқболи 30-солагии Иҷлосияи XVI Шӯрои Олӣ ва 31-солагии Истиқлолияти давлатӣ аз ҷониби соҳибкори маҳаллӣ Абдусамад Соҳибов бо харҷи беш аз 1,5 миллион сомонӣ бунёд гардид.

Иншоот аз ду ошёна иборат буда, дар чор гурӯҳ 100 нафар ба таълиму тарбия фаро гирифта мешаванд ва 15 нафар соҳиби ҷойи кор мегарданд.

Дар шафати кӯдакистон ҳамзамон тарабхона барои гузаронидани тӯю маъракаҳо ва як ошхона барои аҳолӣ бунёд гардида, бо ташаббуси соҳибкор ҳудуди иншоот ободу зебо гардонида хоҳад шуд.

Раиси вилоят барои анҷоми корҳои ободонӣ ва бунёди иншооти барои мардум зарурӣ ба соҳибкор изҳори сипос карда, сохтмони чунин биноҳои замонавиро дар деҳоти ноҳия талаботи рӯз арзёбӣ намуд.

АКС: Хадамоти матбуоти Раиси вилояти Суғд