Дилрабо Мансурӣ бо Виктор Олшавский мулоқот намуд

Октябрь 11, 2022 11:55

ДУШАНБЕ, 11.10.2022 /АМИТ «Ховар»/. Имрӯз муовини Раиси Маҷлиси намояндагони Маҷлиси Олии Ҷумҳурии Тоҷикистон Дилрабо Мансурӣ бо Роҳбари дафтари Ташкилоти умумиҷаҳонии Тандурустӣ (ТУТ) дар Тоҷикистон Виктор Олшавский мулоқот намуд. Дар ин бора котиби матбуоти Маҷлиси намояндагон Муҳаммадато Султонов ба АМИТ «Ховар» хабар дод.

Дилрабо Мансурӣ ба ТУТ барои дастгирии амалӣ ва таъмини Тоҷикистон бо таҷҳизоти муҳофизатӣ ва тиббӣ дар давраи пандемия изҳори сипос намуда, зикр кард, ки Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатии худ ба Маҷлиси Олии Ҷумҳурии Тоҷикистон изҳор намуданд, ки «саломатии ҷомеа барои ҳар давлат зарур аст. Аз ин рӯ, мо бояд саломатии мардумамонро ҳифз намуда, барои онҳо тамоми шароитро фароҳам орем».

«Ҳукумати Ҷумҳурии Тоҷикистон барои пешгирии паҳншавии вирус тадбирҳои зарурӣ меандешад ва бо созмонҳои минтақавию байналмилалӣ, аз ҷумла ТУТ ҳамкории зич дорад»,- гуфт Дилрабо Мансурӣ.

Муовини Раиси Маҷлиси намояндагон ҳамчунин иброз намуд, ки Тоҷикистон аз соли 1992 узви ТУТ аст ва тайи ин муддат дар доираи ин созмон хеле фаъол буд.

Қонунгузории Тоҷикистон ба санадҳои ҳуқуқӣ ва меъёрҳои байналмилалӣ мутобиқ буда, ба Конститутсияи Ҷумҳурии Тоҷикистон ва санадҳои махсуси қонунгузорӣ оид ба ҳифзи саломатӣ, модар, кӯдак ва дастгирии иҷтимоии оила ҷавобгӯ мебошад.

Тазаккур дода шуд, ки ҳанӯз соли 2016 вакилони парлумон Кодекси тандурустии Ҷумҳурии Тоҷикистонро таҳия ва қабул карда буданд, ки дар он 16 қонуни қаблан қабулшуда танзими соҳаи тандурустӣ ва самтҳои ҳифзи ҳуқуқҳои конститутсиониро дар бар мегирад.

Дар ҷараёни вохӯрӣ ҳамчунин дигар масъалаҳои мавриди таваҷҷуҳи тарафайн баррасӣ гардиданд.

Дар мулоқот раиси кумитаи Маҷлиси намояндагон оид ба масъалаҳои иҷтимоӣ, оила ва ҳифзи саломатӣ Сумангул Тағойзода ва вакили Маҷлиси намояндагон Парвиз Шодизода сухан гуфтанд.

Акс: МН МО ҶТ

Октябрь 11, 2022 11:55

Хабарҳои дигари ин бахш

Вакили Маҷлиси намояндагон дар Форуми Осиёгӣ оид ба аҳолӣ ва рушд дар Босния ва Герсеговина иштирок намуд
Дар Маҷлиси намояндагон фраксияҳои ҳизбӣ таъсис дода шуд
Муовини Раиси Маҷлиси намояндагон бо ҳайати Шоҳигарии Белгия мулоқот намуд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ дар шаҳри Сочӣ аз маҷмааи таълимии «Сириус» дидан намуданд
Раиси Маҷлиси намояндагон бо роҳбарони ҳайатҳои Форуми «Муколамаи занони Осиёи Марказӣ» мулоқот намуд
Рустами Эмомалӣ бо Раиси Думаи давлатии Маҷлиси Федералии Федератсияи Русия Вячеслав Володин мулоқот намуданд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ бо Президенти Федератсияи Русия Владимир Путин мулоқот намуданд
Рустами Эмомалӣ бо Раиси Шурои Федератсияи Маҷлиси Федералии Федератсияи Русия Валентина Матвиенко мулоқот намуданд
Рустами Эмомалӣ дар назди оромгоҳи Сарбози номаълум дар боғи Александри шаҳри Москва гулчанбар гузоштанд
Рустами Эмомалӣ барои анҷом додани сафари расмӣ вориди шаҳри Москва гардиданд
Дар Маҷлиси намояндагон Қонуни Ҷумҳурии Тоҷикистон «Дар бораи маърифати экологии аҳолӣ» баррасӣ гардид
Рустами Эмомалӣ ба шаҳри Москваи Федератсияи Русия сафар намуданд