Дубай ва Абузабӣ тамоми маҳдудиятҳои ковидиро лағв намуданд

ДУШАНБЕ, 09.11.2022 /АМИТ «Ховар»/. Дубай ва Абузабӣ аз 8 ноябр қоидаҳои вуруди сайёҳони хориҷиро сода карданд. Ба иттилои АМИТ «Ховар», дар ин бора Ассотсиатсияи ширкатҳои сайёҳии Россия (АШСР) хабар медиҳад.

Барои ворид шудан ба Дубай, дигар зарур нест, ки сайёҳон шаҳодатномаи эмкунӣ ё санҷиши ПЦР пешниҳод кунанд, менависад AШСР бо истинод ба ширкати ҳавопаймоии Emirates. Дирӯз, 8 ноябр Абузабӣ низ аз чунин тасмим хабар дод.

«Коршиносон интизор доранд, ки имрӯз аморатҳои дигар, аз ҷумла Шарҷа ва ширкати ҳавопаймоии он- Air Arabia низ ба қоидаҳои вуруд ҳамин гуна тағйироти расмӣ ворид менамоянд»,-омадааст дар изҳороти AШСР.

Як рӯз пеш, 7 ноябр роҳбарияти Амороти Муттаҳидаи Араб (АМА) тақрибан ҳама маҳдудияти коронавирусро лағв карданд. Ба сайёҳон ва сокинони маҳаллӣ, ба ҷуз аз муассисаҳои тиббӣ иҷозат дода шуд, ки ниқоб напӯшанд. Дар баробари ин сайёҳон метавонанд барои боздид аз ҷойҳои тамошобоб гузарномаи сабз, ки санҷиши манфии ПЦР-ро тасдиқ мекунад, пешниҳод накунанд.

Фирӯза ДАВЛАТЗОДА,
АМИТ «Ховар»

ДАР АКС: соҳил дар Дубай. АКС: AFP 2022 / Karim Sahib