Имрӯз дар ИМА интихобот оғоз мешавад: амрикоиҳо киро интихоб мекунанд

ДУШАНБЕ, 08.11.2022 /АМИТ «Ховар»/. 8 ноябр дар Иёлоти Муттаҳидаи Амрико интихобот доир мегардад. Амрикоиҳо Палатаи намояндагон, сеяки сенат, маҷлисҳои қонунгузор ва раисони шаҳрҳояшонро дар бисёр иёлатҳо интихоб менамоянд. Натиҷаҳои онҳо ногузир ба ду соли минбаъдаи президентии Ҷо Байден ва сиёсати ӯ таъсири амиқ мегузоранд, хабар медиҳад АМИТ «Ховар» бо истинод ба ВВС.

Ин интихоботро маъмулан миёнадаврӣ меноманд ва онҳо дар миёнаи давраи раёсати президентӣ баргузор мешаванд. Дар он президент интихоб намекунанд, вале дар системаи сиёсии Амрико на ҳама чиз ба президент вобаста аст ва интихобкунандагон бояд тасмим бигиранд, ки мансабҳои дигари интихобшаванда — аъзои Конгресс, сенаторҳо, губернаторҳо ва аъзои маҷлисҳои қонунгузори иёлотро киҳо ишғол мекунанд.

Бисёр иёлот маҷлисҳои қонунгузор, губернаторон ва котибони давлатии худро интихоб мекунанд. Ин амали муҳим барои интихоботи оянда дар соли 2024, замонест, ки Амрико президенташро интихоб мекунад.

Ҷо Байден чандин маротиба гуфта буд, ки номзадии худро ба мақоми президентӣ пешбарӣ хоҳад намуд. На ҳама ба ӯ бовар доштанд; бисёриҳоро он чиз ба тааҷҷуб меорад, ки соли 2024, баъди интихобот сиёсатмадор ба синни 82 мерасад. Агар натиҷаҳои ин интихобот барои демократҳо хеле нобарор гарданд ва агар рейтинги Байден моҳҳои оянда барқарор нашавад, вай дар дохили ҳизб таҳти фишори шадид қарор гирифта, маҷбур мешавад, ки роҳро барои номзадҳои ояндадор боз намояд.

Шаҳлои САДРИДДИН,
АМИТ «Ховар»

АКС: Reuters