МАОРИФ-СОҲАИ АФЗАЛИЯТНОК. Дар деҳаи Деҳқонободи шаҳри Турсунзода масъалаи набудани мактаб ҳал гардид

Ноябрь 30, 2022 11:56

ТУРСУНЗОДА, 30.11.2022 /АМИТ «Ховар»/. Дар деҳаи дурдасти Деҳқонободи Ҷамоати деҳоти Регари шаҳри Турсунзода бинои асосии муассисаи таълимии №50 ботантана мавриди баҳрабардорӣ қарор дода шуд, иттилоъ медиҳад хабарнигори минтақавии АМИТ «Ховар» Субҳониддини МАҲМУД.

Дар расми ифтитоҳи он муовинони раиси шаҳр ва сокинону хонандагон иштирок намуданд.

Сохтмони бинои муассисаи таълимии №50 дар замони Шӯравӣ оғоз гардида буд. Мутаассифона, бо сабаби пош хӯрдани Иттиҳоди Шӯравӣ сохтмони ин муассиса ба анҷом нарасида, дар даврони нобасомониҳо биноҳои нотамоми он ба харобазор табдил гардиданд. Зиёда аз 200 нафар кӯдакони деҳаи Деҳқонобод дар муассисаи таълимии ибтидоӣ, ки бинояш садамавӣ буд, таҳсил мекарданд. Хонандагони синфҳои болоӣ ҳамарӯза то 10 км роҳро тай намуда, дар дигар муассисаҳои таълимӣ дарс мехонданд.

Раиси Ҷамоати деҳоти Регар Изатулло Аҳмадзода гуфт, ки хушбахтона, бо дастгириҳои бевоситаи Раиси шаҳри Турсунзода Парвиз Акрамзода ва соҳибкорону сокинони ҷамоат дар муддати 10 моҳ бинои асосии муассисаи таълимӣ ба таври ҳашар барои сесад нафар хонанда дар як баст сохта, ба истифода дода шуд ва мушкилоти сокинон пурра бартараф гардид. Аз сабаби он ки муассисаи мазкур аз якчанд бино иборат мебошад, ба нақша гирифта шудааст, ки дар оянда давра ба давра биноҳои боқимода низ ба истифода дода шаванд.

Дар маросими ифтитоҳи ин муассисаи таълимӣ ба соҳибкорон, саховатмандону сохтмончиён ифтихорнома ва туҳфаҳои Мақомоти иҷроияи ҳокимияти давлатии шаҳри Турсунзодаро тақдим гардиданд.

Зимни маросими ифтитоҳи муассисаи таълимӣ зикр гардид, ки маориф яке аз соҳаҳои афзалиятноки ҷомеа ба шумор рафта, ояндаи ҷумҳурӣ аз мактабу маориф ва омӯзгор вобастагии калон дорад. Баробари таълиму тарбияи насли наврас таълимдиҳандаро мебояд, ки ҳамарӯза баҳри баланд бардоштани савияи дониши худ кӯшиш карда, усулҳои нав ба нави замонавии таълимро аз худ намояд, то фардо ба шогирдон сабақи маърифат дода тавонад. Ҳамчунин падару модаронро зарур аст, ки масъулият ҳис намуда, фарзандонро дар рӯҳияи ватандӯстию хештаншиносӣ тарбия намуда, дар рушди Тоҷикистони азиз саҳм гузоранд.

Ёдовар мешавем, ки дар шаҳри Турсунзода ҷиҳати татбиқи сиёсати маорифпарваронаи муҳтарам Пешвои миллат бо мақсади муҳайё намудани шароити таҳсил дар заминаи 25 муассисаи таълимӣ сохтмони 265 синфхонаи иловагӣ барои 6360 ҷойи нишаст ба нақша гирифта шуда, корҳои сохтмонӣ муташаккилона идома доранд.

АКС: Мақомоти иҷроияи ҳокимияти давлатии шаҳри Турсунзода

Ноябрь 30, 2022 11:56

Хабарҳои дигари ин бахш

Ҷаласаи ситоди даври чоруми Озмуни ҷумҳуриявии «Илм – фурӯғи маърифат» баргузор гардид
Дар Донишгоҳи технологии Тоҷикистон раванди озмоишии модулҳои таълимии лоиҳаи Донишгоҳи кушодаи инноватсияҳо дар озуқаворӣ гузаронида шуд
Дар Донишгоҳи давлатии Кӯлоб дар мавзуи масъалаҳои мубрами забоншиносӣ ва тарҷумашиносӣ конференсияи байналмилалӣ баргузор шуд
Дар Академияи идоракунии давлатӣ барномаҳои стипендиявии Лаҳистон муаррифӣ гардиданд
Дар Донишгоҳи технологии Тоҷикистон татбиқи лоиҳаҳоии CirculEC ва OFINU баррасӣ шуд
Дар Донишгоҳи давлатии Хоруғ оид ба тағйирёбии иқлим ва пешгирии обшавии пиряхҳо ҳамоиши илмӣ доир гардид
Байни Донишгоҳи давлатии омӯзгории Тоҷикистон ва Донишгоҳи миллии илмҳои компютерӣ ва рушдёбандаи Покистон созишномаи ҳамкорӣ ба имзо расид
Академияи идоракунии давлатии Тоҷикистон бо ширкати «Really English»-и Британия ҳамкорӣ менамояд
Вазири маориф ва илми Тоҷикистон дар Конгресси якуми ҷаҳонӣ оид ба таҳсилоти фарогир дар Алмато иштирок намуд
Тоҷикистону Қирғизистон дар самти такмили ихтисоси кормандони соҳаи маориф Ёддошти тафоҳум ба имзо расониданд
Қабули ҳуҷҷатҳо барои иштирок дар Стипендияи байналмилалии «Дурахшандагон» оғоз гардид
Омӯзгорону кормандони соҳаи маориф дар Федератсияи Русия табодули таҷриба намуданд